Գյումրիի կենտրոնական շուկայի հարյուրավոր մանր ու միջին զբաղվող բոլոր առեւտրականները այսօր՝ սեպտեմբերի 30-ին,  դադարեցրել են աշխատանքը, փակել բոլոր կրպակները եւ բողոքի ակցիա են անցկացնում «Շրջանառության հարկի մասին» նոր օրենքի դեմ։

Գյումրիում NEWS.am-ի թղթակիցը հաղորդում է, որ հարյուրավոր առեւտրականներ փակել են քաղաքի կենտրոնական փողոցները եւ պահանջում են հադիպում Շիրակի մարզի հարկային տեսչությանի պետի հետ։

Այս պահին Շիրակի փոխմարզպետ Հարություն Արշակյանը փորձում է  համոզել առետրականներին բացել ճանապարհը, չխանգարել երթեւեկությանը՝ հաշվի առնելով, որ նոր օրենքը տարածվում է բոլորի վրա եւ այդ եղանակով հնարավոր չէ այն լուծել։ Առեւտրականները չեն համոզվում, նրանք վստահեցնում են, որ պատրաստ են մի քանի օր փակ պահել շուկան, մինչեւ չգա հարկայինի պետն ու պատասխաններ տա իրենց հարցերին։

Հիշեցնենք, որ 2014թ. հոկտեմբերի 1-ից ուժի մեջ է մտնում «Շրջանառության հարկի մասին» ՀՀ օրենքը, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։ Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: Կառավարությունը նոր օրենքը հիմնավորում է խոշոր բիզնեսը հարկային դաշտ բերելու անհրաժեշտությամբ։