Նուբարաշենի բնակիչ, 22-ամյա Վանուշ Ալեքսանյանին դանակահարելու մեջ մեղադրվող եւ մոտ 4 ամիս հետախուզման մեջ գտնվող Սեդրակ Օսիպյանին, որը Երեւանի փոխոստիկանապետ Վալերի Օսիպյանի եղբորորդին է, դեռ չեն հայտնաբերել: NEWS.am-ի հետ զրույցում Սեդրակ Օսիպյանի փաստաբան Կրոմվել Գրիգորյանը պնդեց, որ իր պաշտպանյալն անձամբ է ներկայանալու ոստիկանություն:
«Գործը դեռ նախաքննության փուլում է, քննչական գործողությունները դեռ չեն կատարվել, այդ պատճառով էլ Սեդրակ Օսիպյանը ոստիկանություն չի ներկայանում»,- ասաց նա:
Հարցին՝ արդյոք Սեդրակ Օսիպյանը Հայաստանում է, փաստաբանը չցանկացավ պատասխանել. «Ոչ հերքում եմ, ոչ էլ հաստատում»:
Ի դեպ, նախկինում Կրոմվել Գրիգորյանը պնդում էր, որ Օսիպյանի եղբորորդին Հայաստանում է:
Նշենք, որ Սեդրակ Օսիպյանին հունիսի 3-ին մեղադրանք է առաջադրվել Քրեական օրենսգրքի 112-րդ հոդվածի 1-ին մասով: Նա գտնվում է հետախուզման մեջ:
Ավելի վաղ NEWS.am-ը հայտնել էր, որ դեպքը տեղի է ունեցել 2014թ. հունիսի 1-ի գիշերը Նուբարաշենում: Վիճաբանությունից եւ ծեծկռտուքից հետո 22-ամյա Վանուշ Ալեքսանյանին տեղափոխել էին «Էրեբունի» բժշկական կենտրոն, որտեղ վերջինս վիրահատվել էր: Ըստ ոստիկանության՝ դանակահարողը Երեւանի փոխոստիկանապետ Վալերի Օսիպյանի եղբորորդին է՝ 22-ամյա Սեդրակ Օսիպյանը: Այնուհետեւ, արդեն գործով վկա Սարգիս Հովհաննիսյանի մայրը՝ Սուսաննա Հովհաննիսյանը, աղմկահարույց հայտարարություն էր արել այն մասին, թե հունիսի 1-ին Դավիթաշենում Վալերի Օսիպյանի եղբորորդու մասնակցությամբ տեղի ունեցած դանակահարության դեպքից հետո փոխոստիկանապետն առաջարկել է, որ իր որդին` Սարգիս Հովհաննիսյանը, կատարվածի մեղավորությունը վերցնի իր վրա, իսկ փոխոստիկանապետը կօգնի, որ գործը «ջրեն»: Մամուլի հրապարակումների հիման վրա ՀՔԾ-ում քրեական գործ է հարուցվել: