Ազգային ժողովի ոչ իշխանական քառյակը (ԲՀԿ, ՀԱԿ, ՀՅԴ, Ժառանգություն) հավաքել է Աժ արտահերթ նիստ հրավիրելու համար անհրաժեշտ 44 ստորագրությունները,մեկն էլ ավելի. անկախ պատգամավոր Էդմոն Մարուքյանը նույնպես միացել է ստորագրահավաքին։ Այս մասին ԱԺ առջեւ հավաքված՝ է «Շրջանառության հարկի մասին» ՀՀ օրենքի դեմ բողոքող առեւտրականներին հայտնեցին քառյակի ներկայացուցիչները։
ԲՀԿ պատգամավոր Միքայել Մելքումյանը հավքավածներին կոչ արեց ուղիղ ժամը 17։30-ին մեկ մարդու պես հավաքվել Ազգային ժողովի շենքի մոտ, որպեսզի ճնշում գործադրեն ներսում գտնվող պատգամավորների վրա եւ թույլ չտան, որպեսզի ՀՀԿ-ն տապալի արտահերթ նիստը, ինչպես դա արեց նախօրեին։
Առեւտրականները հեռացան՝ պայմանավորվելով վերադառնալ 17։30-ին։
Նշենք, որ ԲՀԿ պատգամավոր Միքայել Մելքումյանը մշակել է օրենքի նոր նախագիծ, որն այսօր քառյակը փորձելու է քննարկման դնել ԱԺ արտահերթ նիստին։ Դրանով առեւտրականները ընտրության հնարավորություն պետք է ունենան՝ կամ հին օրենքով աշխատել, 3,5 տոկոս հարկ տալ եւ զերծ մնալ հարկային մարմնին շրջանառության մասին տեղեկատվություն տրամադրելուց, կամ նոր օրենքով աշխատել՝ վճարել 1 տոկոս հարկ, բայց հարկային մարմնին ներկայացնել տեղեկատվություն։
Հիշեցնենք, որ 2014թ. հոկտեմբերի 1-ից ուժի մեջ է մտնում «Շրջանառության հարկի մասին» ՀՀ օրենքը, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։ Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: Կառավարությունը նոր օրենքը հիմնավորում է խոշոր բիզնեսը հարկային դաշտ բերելու անհրաժեշտությամբ։
