Անցած տարի Հայաստանում բռնության հետեւանքով 7 կին է զոհվել, իսկ այս տարվա սեպտեմբերի դրությամբ՝ արդեն 9: Այդ մասի այսօր՝ սեպտեմբերի 30-ին, մամուլի ասուլիսի ժամանակ հայտարարեց «Ընդդեմ կանանց նկատմամբ բռնության» կոալիցիայի մասնակիցներից Պերճուհի Կաժոյանը:
Նրա խոսքով՝ ընթացիկ տարում բռնության ենթարկված մարդկանց թվաքանակը երեք անգամ շատացել է: Պաշտոնական տվյալներով՝այս տարի՝ հունվար-սեպտեմբեր ընկած ժամանակահատվածում, 1501 մարդ է ենթարկվել բռնության, այն դեպքում, երբ անցած տարի նմանատիպ 580 դեպք է արձանագրվել: «Շատ հաճախ բռնության դեպքում կանայք խուսափում են դիմել ոստիկանություն, քանի որ վերջինիս նկատմամբ մեծ է անվստահությունը, եւ նրանք հիմնականում դիմում են հասարակական կազմակերպություններին», - նշեց նա:
Մամուլի ասուլիսի եւ «Ընդդեմ կանանց նկատմամբ բռնության» կոալիցիայի մեկ այլ մասնակից Նվարդ Մարգարյանն ընդգծեց «Ընտանեկան բռնության կանխարգելման մասին» օրենքի ընդունման անհրաժեշտությունը, քանի որ այն կբարձրացնի ընտանիքի բոլոր անդամների պաշտպանվածության մակարդակը: