Խորհրդարանական քառյակը, 12 պահանջների հետ կապված, Հայաստանի իշխանություններից առավել ադեկվատ վարքագիծ էր ակնկալում: Այդ մասին այսօր՝ սեպտեմբերի 30-ին, լրագրողներին հայտարարեց ԲՀԿ խմբակցության պատգամավոր Ստեփան Մարգարյանը՝ ի պատասխան հարցին՝ այսօրվա 12 պահանջներից որո՞նք են իրականացրել իշխանությունները, երբ լրանում է քառյակի կողմից նշանակված ժամկետը:
«Կարծում եմ, որ սա իշխանությունների կողմից գոյություն ունեցող խնդիրների նկատմամբ ոչ կառուցողական մոտեցում է: Ես իմ անունից կարող եմ ասել, որ կարելի է մի քանի կետ նշել, որոնց շուրջ իշխանությունները որոշ աննշան քայեր ձեռնարկել են: Սակայն իշխանությունը հիմնականում ոչինչ չի ձեռնարկել: Մենք նույնիսկ մտածում էինք, որ նրանք հավանաբար ցանկանում էին ինչ-որ բան անել, սակայն չեն հասցրել, բայց ոչ՝ իշխանությունները ոչինչ էլ չձեռնարկեցին», - ասաց պատգամավորը՝ նշելով, որ խորհրդարանական քառյակը իր միասնական դիրքորոշումը կարտահայտի այդ կապակցությամբ մոտ ժամանակներս: Մարգարյանը նաեւ նշեց, որ հոկտեմբերի 3-ին խորհրդարանական արդեն եռյակը Ազատության հրապարակում ցույցի ընթացքում կհայտարարի հետագա քայլերի մասին:
Ի պատասխան հարցին՝ կա՞ն արդյոք նախադրյալներ, որ իշխանությունները զգուշանում են վերահաս ցույցից, պատգամավորը հավաստիացրեց. «Ոչ ոք որեւէ մեկին վախեցնելու նպատակ իր առջեւ չէր դրել: Մենք հայտարարել էինք՝ ինչ վիճակում է գտնվում երկիրը, ներկայացրել 12 կետեր, որոնք դուրս կբերեին այդ իրավիճակից: Մենք ցանկանում ենք հասնել խնդիրների լուծմանը եւ մտադիր չենք որեւէ մեկին վախեցնել»:
