Խորհրդարանական եռյակի մարզային հանդիպումներին մասնակցող յուրաքանչյուր կուսակցություն ինքն է որոշում՝ ինչ կոչերով հանդես գալ, սեպտեմբերի 30-ին լրագրողների հետ զրույցում հայտարարել է ԲՀԿ-ական պատգամավոր Ստեփան Մարգարյանը՝ պատասխանելով հարցին, թե մտադիր է արդյոք ԲՀԿ-ն իշխանափոխություն եւ խորհրդարանական ու նախագահական արտահերթ ընտրություններ պահանջել:
«Հայաստանի իշխանությունը հեռացող է, այդպիսին է մեր գործող Սահմանադրությունը, եւ մենք կարծում ենք, որ սահմանադրական լրացումները կոչված են պահպանելու ներկայիս իշխանություններին: Մենք այս փուլում դեմ ենք սահմանադրական բարեփոխումներին»,- ասել է Մարգարյանը:
Ի պատասխան ճշտող հարցին, թե մտադիր է արդյոք ԲՀԿ-ն երբեւէ իշխանափոխություն պահանջել, պատգամավորը նշել է, որ երբ իրենք հայտարարում են, որ դեմ են իշխանության վերարտադրությանը, դա արդեն իշխանափոխության պահանջ է. «Թե ինչ կպահանջենք, թույլ տվեք ինքներս որոշենք եւ իր ժամանակին հայտարարենք»:
Մարգարյանը նաեւ չի կարողացել միանշանակ պատասխանել՝ ԲՀԿ-ն ընդդիմադիր կուսակցությո՞ւն է, թե՞ «այլընտրանքային» քաղաքական ուժ: «Այս պահին ես սա բառախաղ եմ համարում. Եթե մենք չենք հայտարարում, որ ընդդիմություն ենք, արդյոք անում ենք ինչ-որ բան, ինչը չի՞ անում ընդդիմությունը: Մենք անում ենք այն, ինչը ժողովրդի համար ճիշտ ենք համարում այս փուլում»,- ամփոփել է պատգամավորը:
