Հայաստանի խորհրդարանը 2012թ. մարտին ընդունել է «Արտակարգ դրության իրավական ռեժիմի մասին» օրենքը, որը սահմանադրական դրույթները խեղաթյուրող մի շարք հակասություններ է պարունակում: Այդ մասին այսօր՝ սեպտեմբերի 30-ին, խորհրդարանում հայտարարեց ՀԱԿ խմբակցության պատգամավոր Գագիկ Ջհանգիրյանը՝ ներկայացնելով «Հայ ազգային կոնգրեսի» կողմից նախաձեռնած «Արտակարգ դրության իրավական ռեժիմի մասին» օրենքում փոփոխություններ եւ լրացումներ կատարելու «Հայ ազգային կոնգրեսի» կողմից նախաձեռնած օրինագիծը:
«Սահմանադրությունը սպառիչ իրավասություններ է տալիս երկրի բոլոր սահմանադրական մարիններին, ինչը նշանակում է, որ մենք չենք կարող այս կամ այն մարմնին օժտել իրավասություններով՝ տարբեր սահմանադրությամբ նախատեսվածից», - ընդգծեց Ջհանգիրյանը:
Նրա խոսքով՝ գործող օրենքի խնդիրն այն է, որ արտակարգ դրության իրավական ռեժիմը նախատեսված է Սահմանադրության 55-րդ հոդվածի 14-րդ կետով, որից հետեւում է, որ նախագահը իրավունք չունի արտակարգ դրության դեպքում օգտագործել զինված ուժերին: «Այդ հնարավորությունը տալիս է միայն Սահմանադրության 55-րդ հոդվածի 13-րդ կետը, երբ նախագահը պարտավոր է ռազմական դրություն հայտարարել, եթե կա Հայաստանի վրա հարձակման անմիջական սպառնալիք կամ հարձակման իրական սպառնալիք, կամ էլ պետք է պատերազմ հայտարարել: Սահմանադրությունում զինված ուժերը օգտագործելու հնարավորության այլ դրույթներ չկան», - նշեց Ջհանգիրյանը:
Իր հերթին, Պետական-իրավական հարցերով մշտական խորհրդարանական հանձնաժողովի ղեկավար Հովհաննես Սահակյանը հիշեցրեց, որ հանձնաժողովն ի սկզբանե բացասական եզրակացություն է տվել այս օրինագծին:
«Արտակարգ դրության իրավական ռեժիմի մասին» օրենքի հակասահմանադրական կամ սահմանադրական դրույթների մասին դեբատներում վերջին խոսքը Սահմանադրական դատարանինն է», - հայտարարեց Սահակյանը՝ շահագրգիռ կողմերին խորհուրդ տալով դիմել Սահմանադրական դատարան: Իշխող կուսակցության ներկայացուցչի խոսքով ընդդիմությունն այս օրինագիծն օգտագործում է պաթետիկ հայտարարություններ անելու եւ ժողովրդին սիրաշահելու նպատակով:
