74-ամյա կանադահայ գործարար, ավտոմեքենաների եւ ծանր սարքավորումների ներկրմամբ զբաղվող Tokmakjian Group Су ընկերության ղեկավար Սայ Թոքմաջյանին Կուբայում 15 տարվա ազատազրկման են դատապարտել, հայտնում է CHCH-ը: Դատարանը նրան մեղավոր է ճանաչել կաշառակերության, հարկերից խուսափելու մեջ եւ տարբեր տնտեսական հանցագործություններում, որոնք վնաս են հասցրել պետությանը: Սակայն ընկերությունը պնդում է, որ այս բոլոր մեղադրանքներն անհեթեթ են, իսկ գործն ամբողջությամբ կեղծված է: Ավելին, ընկերության ներկայացուցիչները պատրաստ են եղել ապացուցել դա, սակայն Tokmakjian Group-ի փորձագետներին չեն թողել ներկա գտնվել դատական նիստին: Հաղորդվում է, որ Կուբայի իշխանությունները ձերբակալել են ընկերության ավելի քան 100 միլիոն դոլարի հաշիվները:
Մեղադրյալի ընտանիքը մամուլի ասուլիս է կազմակերպել՝ հուսալով համոզել Կուբայի իշխանություններին Թոքմաջյանին թողնել տուն: Գործարարի որդի Րաֆֆի Թոքմաջյանը հայտնել է, որ հորը չի տեսել արդեն 3 տարի, սակայն խոսել է նրա հետ եւ իմացել, որ այժմ զինվորական հոսպիտալում է:
NEWS.am-ն ավելի վաղ հայտնել էր, որ մեծ իրարանցում էր առաջացրել նաեւ կանադացի մեկ այլ հայ գործարար Սարգիս Յակուբյանի գործը: 2013թ. մայիսին Կուբայի դատարանը նրան մեղավոր էր ճանաչել կաշառակերության, հարկերից խուսափելու եւ ազգային տնտեսությանը վնաս հասցնող գործունեության մեջ: Նա Կուբայում դատապարտվել էր 9 տարվա ազատազրկման, սակայն ավելի ուշ ազատ էր արձակվել եւ ուղարկվել Կանադա: Յակուբյանը Tri-Star Caribbean ընկերության սեփականատերն էր, որն զբաղվում էր շտապօգնության մեքենաների եւ պետկառույցների համար տրանսպորտի այլ միջոցների մատակարարմամբ, դրա շրջանառությունը տարեկան կազմում էր 30 միլիոն դոլար:
