Հայ-ադրբեջանական սահմանագոտու հարավ-արևմտյան ուղղությամբ տեղակայված զորամասերից մեկի պահպանության տեղամասի մարտական հենակետում հունիսի 20-ին մահացու հրազենային գնդակային վիրավորում ստացած Գրիշա Խաչատրյանի գործով նախաքննությունը շարունակվում է: Այս մասին NEWS.am-ին հայտնեցին մահացած զինվորի հարազատները:
Նրանց փոխանցմամբ՝ փորձաքննությունների պատասխանները դեռ չկան:
«Փորձաքննություններ են նշանակվել, որոնց եզրակացությունները մենք դեռ չունենք: Սպասում ենք, չգիտենք, թե երբ գործը դատարան կգնա»,- ասաց մեր զրուցակիցը:
Նշենք, որ հունիսի 26-ին դեպքի վայրը չպահպանելու եւ այն խեղաթյուրելու համար ՀՀ քր. օրենսգրքի 375 հոդվածի 1-ին մասով նախատեսված հանցագործություն կատարելու կասկածանքով կալանավորվել է նույն զորամասի պայմանագրային զինծառայող, սերժանտ Վարդան Առաքելի Կիրակոսյանը: Մինչդեռ հարազատները պնդում են, որ Գրիշային սպանել են:
Ավելի վաղ NEWS.am-ը հայտնել էր, որ հունիսի 20-ին, հայ-ադրբեջանական սահմանագոտու հարավ-արևմտյան ուղղությամբ տեղակայված զորամասերից մեկի պահպանության տեղամասի մարտական հենակետում մահացու հրազենային գնդակային վիրավորում է ստացել ժամկետային զինծառայող, շարքային Գրիշա Մուրադի Խաչատրյանը (ծնվ. 1994թ., Սիսիանի զ/կ, 2013-1 զորակոչ): Ավելի ուշ պաշտպանության նախարար Սեյրան Օհանյանը լրագրողներին հայտնել էր, որ նախնական տվյալներով, Գրիշա Խաչատրյանը մահացու վիրավորում ստացել է զենքի օգտագործման կանոնները խախտելու հետեւանքով: