Թող Հայաստանի իշխանությունը չմտածի, որ երկրում նորից 1937 թվականն է: Այս մասին ԱԺ-ում հայտարարել է ԲՀԿ խմբակցության պատգամավոր Վահան Բաբայանը:
Նրա խոսքով՝ Հայաստանի գլխավոր թշնամին նույնիսկ իշխանություն ունեցողների ագրեսիան չէ, այլ այն անձանց անտարբերությունը, ով որոշել է, որ իրենից ոչինչ կախված չէ: «Մարդիկ, որոնք չգիտեն ինչ անել, անգործության են մատնվում: Շատերը անտարբեր մնալով փորձում են դիմադրել դրական փոփոխություններին, որն իր հետ բերում է եռյակը (ԲՀԿ, ՀԱ, «Ժառանգություն»): Եռյակը առողջ ուժ է, որը իրապես կարող է փոխել իրավիճակը Հայաստանում»,-վստահեցրել է Բաբայանը:
Այդուհանդերձ, դա չի հանում պատասխանատվությունը իրավապահ մարմինների վրայից, որոնք ոչնչով չարադարացված գործողություններ են կիրառել բողոքի ելած տոնավաճառների առեւտրականների նկատմամբ: «Եթե մենք չենք ապրում 1937 թվականին, ինչու են նրանց կանչել ոստիկանություն եւ հարցաքննել, թե ինչու են մասնակցել բողոքի ակցիաների եւ հանրահավաքների: Ուզում եմ դիմել իշխանությունների ներկայացուցիչներին՝ բռնություններ չիրականացնել: Մենք դա անթույլատրելի ենք համարում»,-ընդգծել է ԲՀԿ-ական պատգամավորը: