Հայաստանի ԱԺ արտահերթ նիստին պիտի գան բոլոր պատգամավորները: Այս մասին, այսօր՝ սեպտեմբերի 30-ին, ԱԺ հայտարարությունների ժամին իր ելույթում նշել է ՀԱԿ խմբակցության քարտուղար Արամ Մանուկյանը:
Նրա խոսքով՝ խորհրդարանական 4 ուժերի (ԲՀԿ, ՀԱԿ, ՀՅԴ, «Ժառանգություն») նախաձեռնությամբ գումարվող արտահերթ նիստը պահանջում է բոլոր պատգամավորների ներկայությունը՝ ՀՀ Սահմանադրության համաձայն:
Նա կոչ է արել չբոյկոտել նիստը, քանի որ այնտեղ քննարկվելու է բնակչության լայն շերտերի համար շատ անհրաժեշտ թեմա:
Հիշեցնենք, որ արտահերթ նիստում քննարկվելու է «Շրջանառության հարկի» մասին օրենքի փոփոխությունները, որոնք ուժի մեջ են մտնում հոկտեմբերի 1-ից: Այդ փոփոխությունների համաձայն փոքր եւ միջին ձեռնարկությունների (տարեման մինչեւ 58 մլն դրամի շրջանառություն ունեցող) համար հարկը 3,5 տոկոսից կնվազի մինչեւ 1 տոկոսի, սակյան առեւտրականներին մտահոգում է այն, որ իրենցից պահանջում են փաստաթղթերով ներկայացնել թե որտեղից եւ ինչ գնով են ձեռք բերել ապրանքը, ինչը նրանք անել պարզապես չեն կարող, քանի որ խոշոր գործարարները նման փաստաթղթեր նրանց չեն տրամադրում: