Երեւանի Այգեստան 167 տան մոտ, դեպի Սարալանջ տանող նոր ճանապարհին այսօր՝ սեպտեմբերի 30-ին, հնչած կրակոցներից վիրավորվածը 21-ամյա Լեւոն Հարությունյանն է:
NEWS.am-ին «Էրեբունի» բժշկական կենտրոնից հայտնեցին, որ տուժածն իրենց մոտ է տեղափոխվել, ստացել բուժօգնություն եւ դուրս գրվել:
«Լեւոն Հարությունյանը ստացել էր ձախ ոտնաթաթի թափանցող հրազենային վնասվածք կոտրվածքով: Լուրջ խնդիր չի եղել, այդ պատճառով չենք հոսպիտալացրել»,- ասացին բժշկական կենտրոնից:
Նշենք, որ ըստ «Փաստինֆո»-ի՝ Լեւոն Հարությունյանը «Շարլոտ» գիշերային ակումբի սեփականատիրոջ որդին է, իսկ այս միջադեպն էլ օգոստոսի 26-ի ծեծկռտուքի շարունակությունն է: Հիշեցնենք, որ այդ օրը գիշերը Բաղրամյան պողոտայում գտնվող «Շարլոտ» գիշերային ակումբում վիճաբանություն ու ծեծկռտուք էր տեղի ունեցել ակումբի տերերի ու հաճախորդների միջև: Հաճախորդների մեջ են եղել Կենտրոնի հարկայինի պետը, նաեւ ԱԱԾ աշխատակից: Վերջիններս դեպքից օրեր անց աշխատանքից ազատվեցին: Ըստ լրատվամիջոցների՝ մասնակիցների մեջ է եղել նաեւ ֆինանսների նախարարի որդին:
Ավելի վաղ NEWS.am-ը հայտնել էր, որ Սարալանջում մի մեքենայից կրակոցներ են հնչել մյուսի ուղղությամբ, որի մեջ գտնվողը ոտքին ստացել է վնասվածք: Երթեւեկության ընթացքում «Ռենջ Ռովեր» մակնիշի մեքենայի ուղղությամբ կրակոցներ են արձակել ու դիմել փախուստի: Թե ինչ պատճառով է վեճը ծագել, դեռ հայտնի չէ: Դեպքի վայրից հայտնաբերվել են պարկուճներ:
