Աշխարհահռչակ ֆրանսիական շանսոնյե Շառլ Ազնավուրը, ով Շվեյցարիայում Հայաստանի դեսպանն է, շվեյցարական «RTS» հեռուստաալիքին տված հարցազրույցում վրդովմունք է հայտնել Հայոց ցեղասպանության թուրքական ժխտման կապակցությամբ եւ կոչով դիմել թուրքերին ու Թուրքիայի նախագահ Ռեջեփ Թայիփ Էրդողանին:
Հաղորդավարի հարցին այն մասին, հնարավո՞ր է երբեւէ հաշտեցում հայերի եւ թուրքերի միջեւ, Շառլ Ազնավուրը պատասխանել է. «Անկասկած, հարկավոր է այդ անել, քանի որ մենք ժողովուրդներ ենք, որոնք շատ առումներով նման են միմյանց: Մենք բազմաթիվ շփման կետեր ունենք: Բացի այդ, ծիծաղելի եմ համարում, որ այսօր մի կողմից ատելություն կա, իսկ մյուս կողմից՝ հիշողության բացակայություն եւ մշտական սուտ»:
Ավելին, 90-ամյա երգիչը հույս է հայտնել, որ մինչեւ իր վախճանն ականատես կլինի հայերի եւ թուրքերի հաշտեցմանը: Նա հիշեցրել է, որ Էրդողանին առաջարկվել է 2015 թվականի ապրիլի 24-ին Հայաստան այցելել, սակայն թուրք նախագահը դեռեւս չի պատասխանել: «Իսկ եթե նա գնա, ես էլ նրա հետ կգնամ»,- ասել է Ազնավուրը:
Դիմելով Թուրքիայի նախագահին՝ երգիչն ասել է. «Ժխտումը շատ թանկ արժե: Այդ գումարները կարելի է այլ բանի համար ծախսել: Օրինակ՝ օգնել այն երիտասարդ թուրքերին, ովքեր, հնարավոր է, համալսարանում սովորելու միջոցներ չունեն: Այդ գումարները գողացվում են ժխտողների կողմից, ովքեր ոչինչ չգիտեն, ովքեր հայտնի չէ՝ ինչ են պատմում. ե՛ւ թուրքերը, ե՛ւ ադրբեջանցիները: Հարկավոր է ատել ժխտողներին: Ժխտումը մասնագիտություն է, շատ վատ մասնագիտություն»:
Ազնավուրը նաեւ թուրքերին է դիմել. «Ես ցանկանում եմ թուրքերին ասել, որ մենք եղբայրներ ենք, մենք միշտ եղբայրներ ենք եղել»,- հայտարարել է նա՝ հավելելով, որ չնայած պատմության ընթացքում երկու ժողովուրդներին բաժանող պահեր են եղել, հարկավոր է հաղթահարել դրանք եւ նորից սկսել ապրել միասին:
Հարցազրույցի ավարտին երգիչը, ով 90 տարեկանում համերգներով շրջագայում է ամբողջ աշխարհում, հույս է հայտնել, որ կդառնա «առաջին 100-ամյա երգիչը բեմում»: «2024 թվականի մայիսի 24-ին՝ իմ 100-ամյակին, եկեք ինձանից հարցազրույց վերցնելու»,- «RTS»-ի հաղորդավարին ասել է Ազնավուրը:
