ԱԺ Հանրապետական խմբակցության պատգամավորների կողմից խորհրդարանական քառյակի նախաձեռնած Ազգային ժողովի արտահերթ նիստը տապալելը օրենքի խախտում է, եւ ոչ իշխանական ուժերը վաղը առավոտյան քաղաքական ուժերի մասնակցությամբ հանդիպում են պահանջելու կառավարությունից: Այս մասին այսօր՝ սեպտեմբերի 30-ին ԱԺ շենքի մոտ հավաքված «Շրջանառության հարկի մասին» օրենքի դեմ բողոքող քաղաքացիներին տեղեկացրեց ՀՅԴ խմբակցության պատգամավոր Արծվիկ Մինասյանը։
«Մեծամասնությունը, խախտելով օրենքի եւ սահմանադրության պահանջները, հրաժարվում է մասնակցել քննարկմանը: Մենք կքննարկենք այդ լուծումները չի բացառվում, որ սահամանադրական դատարան դիմենք եւ մեծամասնության անգործությունը բողոքարկենք, եւ այս ընթացքում պահանջենք կասեցնել օրենքի կիրառումը, մինչեւ չգտնվի արդյունավետ լուծում: Երկրորդ՝ մենքը վաղը առավոտյան հանդիպում պետք է պահանջենք կառավարությունից: Եթե վաղը համաձայնության գանք Կառավարության հետ, ապա կկասեցվի օրենքը՝ մինչեւ համատեղ քննարկման արդյունքում միատեսակ լուծում գտնելը»,- նշեց Արծվիկ Մինասյանը:
Պատգամավորն առեւտրականներին կոչ արեց շարունակել պայքարը, քանի որ հակառակ դեպքում կառավարությունը կգործարկի օրենքը:
«Մեր գլխավոր խնդիրը պետք է լինի պահանջել, որպեսզի Կառավարությունը եւ քաղաքական մեծամասնությունը իրենց հայտարարած ականջալուր լինելը դարձնեն իրականություն, գան, քննարկեն, ու լուծումներ տրվեն: Եթե մենք հանկարծ դադարեցրեցինք մեր պահանջը, բողոքի ալիքը, ապա կառավարությունը կգործարկի այս օրենքը»,- հայտարարեց ՕԵԿ-ական պատգամավորը:
Նշենք, որ այսօր խորհրդարանական մեծամասնությունը, ի դեմս իշխող Հանրապետական խմբակցության պատգամավորների, տապալեց խորհրդարանական քառյակի նախաձեռնած Ազգային ժողովի արտահերթ նիստը: Խորհրդարանի ոչ իշխանական քառյակը Ազգային ժողովի արտահերթ նիստ գումարելու համար 49 ստորագրություն էր հավաքել, սակայն գրանցվել էր 37 պատգամավոր՝ քվորում չի ապահովվել: Արտահերթ նիստին ծրագրվում էր քննարկել ԲՀԿ խմբակցության պատգամավոր Միքայել Մելքումյանի մշակած «Շրջանառության հարկի մասին» օրենքում փոփոխությունների փաթեթը։
Նշենք, որ «Շրջանառության հարկի մասին» նոր օրինագծի համաձայն, առեւտրականները պետք է ընտրության հնարավորություն ունենան. կամ աշխատել հին օրենքով եւ վճարել 3.5% հարկ, իսկ հարկային մարմնին շրջանառության մասին տեղեկատվություն չտրամադրել, կամ աշխատել նոր օրենքով, վճարել 1%, սակայն հարկային մարմնին ներկայացնել շրջանառության մասին տվյալներ:
Հիշեցնենք, որ 2014թ. հոկտեմբերի 1-ից ուժի մեջ է մտնում «Շրջանառության հարկի մասին» ՀՀ օրենքը, ըստ որի առեւտրականներն իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին, հակառակ դեպքում ձեռնարկությունը կտուգանվի:
