Թուրքիայում օրեր առաջ Բուրսա նահանգի Օրհանգազի շրջանի Քարսաք գյուղի վաճառքի եւ նրա հարեւանությամբ հայերին պատկանած բնակատեղիի հայտարարությունից հետո շրջանում անշարժ գույքի գներն աճել են 10 անգամ:
Թուրքական Sabah պարբերականի փոխանցմամբ՝ Բուրսա նահանգի Քարսաք եւ Գյուվենլի գյուղերի հողատարածքները վերջին օրերին արագ վաճառվում են, քանի որ անշարժ գույքի մի գործակալություն հայտարարություն էր տարածել՝ նշելով. «Վաճառվում է հին հայկական գյուղ առանց միջնորդի» եւ «Վաճառվում է հին հայկական բնակատեղի»:
Անշարժ գույքի գործակալ Էյուփ Բայրաքը նշել է, թե Քարսաք գյուղում, որտեղ մինչեւ 1915-ը հայեր են ապրել, անշարժ գույքի գները շատ են թանկացել: Նա շեշտել է, թե այս պահին վաճառվել է գյուղի հողերի 95 տոկոսը:
Գյուվենլի գյուղի գյուղապետը նշել է, թե անշարժ գույքի գործակալությունը իրենց գյուղի համար եւս նշել է հայկական անունը, որը իրականությանը չի համապատասխանում, քանի որ միայն Քարսաքում են հայեր ապրել: Ըստ գյուղապետի՝ անշարժ գույքի գործակալությունը ցանկացել է գանձագողերի ուշադրությունը հրավիրելու համար իրենց գյուղին եւս տալ հայկական անունը եւ թանկ վաճառել հողերը:
Նշենք, որ օրեր առաջ Թուրքիայում անշարժ գույքի գործակալություններից մեկը «Վաճառվում է հին հայկական գյուղ առանց միջնորդի» եւ «Վաճառվում է հին հայկական բնակատեղի» անուններով հայտարարություններ էր տարածել ինտերնետում:
