Արարատում երիտասարդների միջեւ տեղի ունեցած վիճաբանության հետեւանքով վիրավորված Տիգրանի առողջական վիճակը բավարար է: Այս մասին NEWS.am-ի թղթակցի հետ զրույցում «Արարատի» բ/կ-ի տնօրեն Արայիկ Սարդարյանը:
Նա նշեց, որ վերջինս շաբաթվա վերջին՝ ամենաուշը երկուշաբթի, դուրս կգրվի հիվանդանոցից:
Ոստիկանության մեր աղբյուրներից էլ հայտնի դարձավ, որ դեռեւս երիտասարդներին դանակահարող Ալեքսանը չի հայտնաբերվել, նրա բնակության վայրը շարունակում են հսկել ոստիկանները:
Ավելի վաղ NEWS.am-ը հայտնել էր, որ Արարատում, սեպտեմբերի 22-ին, վիճաբանություն է տեղի ունեցել մի խումբ երիտասարդների միջեւ, որն ավարտվել է նրանցից մեկի մահով: Կռվի ընթացքում երկու 24-ամյա երիտասարդներ՝ Տիգրան եւ Խաչիկ անուններով, ստացել են ազդրերի ու որովայնի շրջանում կտրող ծակող վնասվածքներ:
NEWS.am-ի տեղեկություններով, նրանք տեղափոխվել են Արարատի հիվանդանոց եւ որոշ ժամանակ անց Խաչիկը, որի վնասվածքը ազդրին է եղել, մահացել է: Նրանց վնասվածք պատճառած անձինք դեպքի վայրից դիմել են փախուստի եւ մինչեւ հիմա չեն հայտնաբերվել:
Քննչական կոմիտեից NEWS.am-ի թղթակցին հայտնեցին, որ դեպքի առթիվ հարուցվել է քրեական գործ Քրեական օրենսգրքի 112-րդ հոդվածի 2-րդ մասի 14-րդ կետի (դիտավորությամբ առողջությանը ծանր վնաս պատճառելը, որն անզգուշությամբ առաջացնելով տուժողի մահ, պատժվում է ազատազրկմամբ` 5-10 տարի ժամկետով) եւ 112-րդ հոդվածի 2-րդ մասի 1-ին կետի հատկանիշներով (երկու կամ ավելի անձանց նկատմամբ դիտավորությամբ առողջությանը ծանր վնաս պատճառելը):