Հայաստանի աշխատանքի եւ սոցիալական հարցերի նախարար Արտեմ Ասատրյանը Տարեցների միջազգային օրվա կապակցությամբ շնորհավորական ուղերձ է հղել:
«Ավագ սերնդի սիրելի հայրենակիցներ,
Ջերմորեն շնորհավորում եմ Տարեցների միջազգային օրվա կապակցությամբ:
Հոկտեմբերի 1-ին ողջ աշխարհը նշում է Տարեցների միջազգային օրը, ու թեեւ հայ մարդն ավանդաբար առանձնահատուկ վերաբերմունք ու ընդգծված հարգանք է ցուցաբերել ընտանիքի մեծի, ավագի նկատմամբ, սակայն խորհրդանշական օրը լրացուցիչ առիթ է, որպեսզի բոլորս մեկ անգամ եւս խորհենք ավագ սերնդի ու նրա խնդիրների մասին:
Մեր օրերում փոխվում են բարեկեցիկ ծերության, տարեցների խնամքի հանդեպ մոտեցումները, եւ մենք ձգտում ենք բավարարել այդ փոփոխությունների արդյունքում առաջ եկած ակնկալիքները:
Որպես Աշխատանքի եւ սոցիալական հարցերի նախարար, ցանկանում եմ վստահեցնել, որ մենք շարունակելու ենք ուշադրության կենտրոնում պահել ավագ սերնդի խնդիրներն ու աշխատելու ենք բազմազան սոցիալական ծառայությունների միջոցով նրանց համար արժանապատիվ կյանք ապահովել ու ինտեգրել հասարակությանը: Այս ուղղությամբ անելիքները տակավին շատ են, եւ մենք փորձում ենք օր առաջ հասնել մեր առջեւ դրված այդ նպատակին:
Սիրելի ծնողներ, տատիկներ եւ պապիկներ, նախարարության աշխատակազմի ու իմ անունից մաղթում եմ Ձեզ առողջություն: Ձեր ամենամեծ հարստությունը ձեր զավակներն են, ինչպես նաեւ կենսափորձը: Մաղթում եմ, որ դուք միշտ շրջապատված լինեք որդիական սիրով, եւ վայելեք ձեր փորձը զավակներին փոխանցելու բերկրանքը»:
