Նեօսմանական անհաջող գաղափարներով տարված Թուրքիայի վարչապետ Ահմեդ Դավութօղլուն հերթական արկածախնդրության  մեջ է ներքաշում Թուրքիային՝ խորհրդարան ներկայացնելով մի օրինագիծ, որով Թուրքիայի զինված ուժերին թույլ է տալիս ներխուժել Իրաք եւ Սիրիա:

Սեպտեմբերի 30-ի երեկոյան Թուրքիայի նախարարների խորհդի նիստի ավարտին վարչապետ Ահմեդ Դավութօղլուն ստորագրել է Սիրիա եւ Իրաք ներխուժելու մասին օրինագիծը, որը հաստատման համար ուղարկվել է խորհրդարան:

Ստորագրված օրինագիծը թույլ է տալիս թուրքական զինված ուժեորին ներխուժել Իրաք եւ Սիրիա՝ այնտեղ PKK-ից, Իսլամական պետություն-ից եւ այլ ահաբեկչական խմբավորումներից եկող վտանգների դեպքում: Օրինագիծը նաեւ հնարավորություն է տալիս օտարեկրյա զինված ուժերին օգտագործել Թուրքիայի տարածքը Սիրիայի եւ Իրաքի դեմ գործողությունների համար:

Այս վերջին կետը խիստ հակասական են համարում որոշ լրատվամիջոցներ՝ նշելով, թե այն միտված է Թուրքիային հնարավորություն տալ Սիրիական ազատ բանակ կոչվող խմբավորմանը Թուրքիայում օրինական զինել եւ ռազմական կրթություն տա, որից հետո Սիրական ազատ բանակ կոչվող կառույցի զինյալները կարող են ներխուժել Սիրիա՝ Ասադի դեմ պատերազմելու:

Հիշյալ օրինագծի դեմ են արտահայտվել Թուրքիայի խորհրդարանի ընդդիմադիր կուսակցությունները: Գլխավոր ընդդիմադիր Ժողովրդա-հանրապետական կուսակցության ներկայացուցիչը հայտարարել է, թե իրենք միանշանակ դեմ են, Ազգայնական շարժումը շեշտել է, թե օտարերկրյա ուժեր ասվածը շատ անորոշ է եւ կասկածելի, իսկ քրդական Ժողովուրդների դեմոկրատական կուսակցության Շրնաքից ընտրված պատգամավոր Հասիփ Քափլանը նշել է, թե Սիրիայում եւ Իրաքում ահաբեկչական կազմավորումներին աջակցողը հենց Թուրքիան է եւ իրենք դեմ են քվեարկելու այդ օրինագծին:

Արթուր Հակոբյան