Երեւանում, այսօր՝ հոկտեմբերի 1-ին, մեկնարկել է ‹‹Հայաստանի բարձրագույն կրթության ոլորտի հզորացում Եվրոպական բարձրագույն կրթական տարածքին ինտեգրվելու նպատակով›› թվինինգ ծրագիրը, որն իրականացվում է Եվրոպական Միության աջակցությամբ:
Ծրագրի մեկնարկին նվիրված համաժողովին ներկա են եղել ՀՀ կրթության եւ գիտության նախարարի տեղակալ Կարինե Հարությունյանը, ՀՀ-ում ԵՄ պատվիրակության ղեկավար Տրայան Հրիսթեան, ՀՀ-ում Ֆինլանդիայի դեսպան Քրիստեր Միխելսոնը եւ ՀՀ-ում Գերմանիայի դեսպան Ռայներ Մորելը, ՀՀ կառավարության անդամներ, կրթության ոլորտի ներկայացուցիչներ:
Բացման խոսքում, ազդարարելով ծրագրի մեկնարկը, ՀՀ կրթության եւ գիտության նախարարի տեղակալ Կարինե Հարությունյանը, նշել է, որ ծրագրի նպատակը սոցիալական զարգացման շրջանակում ԵՄ հետ համագործակցության ամրապնդումը եւ եվրոպական լավագույն փորձին համահունչ կրթական բարեփոխումների իրականացումն է, ինչպես նաեւ բուհական կրթության որակի բարելավման աջակցությունը, մասնավորապես աշխատաշուկայի պահանջների համապատասխանության ապահովման նպատակով: Նախարարի տեղակալը, շեշտելով, որ ծրագրի հիմնական շահառուները Հայաստանի բարձրագույն ուսումնական հաստատությունները եւ Մասնագիտական կրթության որակի ապահովման ազգային կենտրոնն (ՈԱԱԿ) են, ներկայացրել է հիմնական ուղղությունները եւ բաղադրիչները: Կ. Հարությունյանի տեղեկացմամբ Եվրոպական Միության աջակցությամբ՝ Հայաստանի Հանրապետության կրթության եւ գիտության նախարարության՝ Ֆինլանդիայի կրթության գնահատման կենտրոնի (FINEEC) եւ Գերմանիայի կրթության ու հետազոտությունների դաշնային նախարարության (BMBF) հետ համատեղ իրականացվող այս ծրագրով նախատեսվում է՝ Հայաստանի բարձրագույն կրթության ոլորտը կարգավորող օրենսդրության եւ Որակավորումների ազգային շրջանակի (ՈԱՇ) վերանայում, ԿԳՆ-ի, ՈԱԱԿ-ի եւ բուհերի աշխատակիցների կարողությունների ընդլայնում Բոլոնիայի գործընթացի իրականացումն ու շարունակականությունն ապահովելու նպատակով, բուհերում Բոլոնիայի գործընթացի հիմնական ուղություններով իրականացվող ծրագրերի աջակցություն, գործատուների եւ ուսանողների պահանջներին համապատասխան ՈԱՇ-ի ներդրում:
Ծրագրի արժեքը մոտ 1000000 եվրո է, տեւողությունը՝ 24 ամիս, ներգրավված են շուրջ 60 միջազգային փորձագետներ Ֆինլանդիայից, Գերմանիայից եւ Էստոնիայից:
