Հայաստանը հոկտեմբերի 10-ին կստորագրի ԵՏՄ-ին անդամակցության մասին պայմանագիրը, եւ հաջորդ տարվա հունվարի 1-ից Հայաստանի անդամակցությունն այդ կառույցին իրականություն կդառնա: Այս մասին, այսօր՝ հոկտեմբերի 1-ն, մամուլի ասուլիսի ժամանակ նշեց Կովկասի ինստիտուտի փոխտնօրեն, քաղաքագետ Սերգեյ Մինասյանը:
Նրա խոսքով՝ այդ պայմանագրում այն դրույթը, որը նախատեսում է մաքսակետի տեղադրում Հայաստանի եւ ԼՂՀ սահմանին, ամենաֆորմալ կետն է պայմանագրի նախագծում: Մինասյանը հավաստիացրեց, որ անհնար է որեւէ ձեւաչափ, որտեղ Հայաստանը եւ Ղարաբաղը ռազմաքաղաքական եւ տնտեսական միություն չկազմեն:
Անդրադառնալով Ռուսաստանի հետ Ղազախստանի եւ Բելառուսի հակասություններին, այդ թվում ԵՏՄ-ին Հայաստանի անդամակցության հետ կապված, քաղաքագետն ընդգծեց. «Իրականում Հայաստանն ավելի շատ պատճառ էր Ղազախստանի եւ Բելառուսի համար, որպեսզի լուծեն որոշակի խնդիրներ Ռուսաստանի հետ: Հայաստանի անդամակցության գործոնը հարմար առիթ էր Աստանայի ու Մինսկի համար, որ օգտագործեն այն որպես լծակ ռուսական կողմից ավելի բարենպաստ պայմաններ պոկելու համար»: Ղազախստանի դեպքում, ըստ նրա, տեղ է գտել նաեւ թյուրքական համերաշխությունը: