ՆԱՏՕ-ի գլխավոր քարտուղարի պաշտոնը այսօրվանից՝ հոկտեմբերի 1-ից, կզբաղեցնի Նորվեգիայի նախկին վարչապետ Յենս Սթոլթենբերգը, հաղորդում է Gazeta.ru-ն:
Պարբերականի փոխանցմամբ՝ նրա նշանակումով Դաշինքի քաղաքականությունը Ռուսաստանի նկատմամբ դժվար թե լրջորեն փոխվի, սակայն ՆԱՏՕ-ի նոր ղեկավարը դեռեւս այդքան կտրուկ դժգոհություն չի առաջացնում Մոսկվայում, ինչպես իր նախորդը՝ Անդերս Ֆոգ Ռասմուսենը:
Սթոլթենբերգը առաջին նորվեգացին է այդ պաշտոնում: Նա հանդես է գալիս որպես սոցիալական պետության կողմնակից եւ երկար տարիներ գլխավորել է Նորվեգիայի աշխատանքային կուսակցությունը: Նա իր կարիերան սկսել է որպես նորվեգական ազդեցիկ թերթի լրագրող:
Պարբերականի հիշեցնում է, որ ՌԴ նախագահ Վլադիմիր Պուտինը իր հարցազրույցներից մեկում դրական է արտահայտվել Սթոլթենբերգի մասին: «Ռուսաստանի հետ հարաբերություններում նրան ծանր բեռ է բաժին հասել: Ռուսաստանի եւ ՆԱՏՕ-ի միջեւ ռազմաքաղաքական համագործակցությունը դադարեցվել է Ուկրաինայում տեղի ունեցող իրադարձությունների պատճառով, ռուս զինվորականները կրկին Դաշինքին թշնամաբար են վերաբերվում: ՆԱՏՕ-ն արագ արձագանքման ուժեր է տեղակայում ՌԴ սահմանների մոտ, իսկ ծեր գեներալները կրկին խոսում են սառը պատերազմի լեզվով»,-ասել է ՌԴ նախագահը: