Հայաստանի Հանրային հեռուստատեսության վարկանիշն աճել է գովազդի բացակայության պատճառով: Այդ մասին այսօր՝ հոկետեմբերի 1-ին, խորհրդարանում հայտարարեց Հայաստանի Հանրային հեռուստառադիոընկերության խորհրդի նախագահ Ռուբեն Ջաղինյանը: Նրա խոսքով՝ դա տեղի է ունեցավ այն բանից հետո, երբ 2014թ. սկզբից եթերից արգելվեց կոմերցիոն գովազդը: «Բնականաբար, հանդիսատեսին հաճելի է առանց ընդհատումների ֆիլմեր ու հաղորդումներ դիտել», - հավելեց նա:
Մյուս կողմից, Հանրային հեռուսատեսությունում ավելի շատ սոցիալական գովազդ կցուցադրվի: Այն կլինի դիպուկ, ըմբռնելի եւ գործուն: «Մենք կընդլայնենք վերջինիս եթերային ժամանակը եւ, իհարկե, նաեւ որակը», - հավաստիացրեց Ջաղինյանը: