Ամենայն հայոց կաթողիկոս Գարեգին Բ-ն առաջին անգամ այցելել է Մյանմար, հայտնում է The Irrawaddy-ին: Այցի հիմնական նպատակը հայկական եկեղեցու դիրքերի ամրապնդումն է եւ Մյանմարում հայ համայնքի ժառանգության պահպանմանն աջակցելը, նշում է հրատարակչությունը՝ վկայակոչելով հայկական պատվիրակության հայտարարությունը:
Յանգոն քաղաքի կենտրոնում, որը նախկինում Ռանգուն էր կոչվում, գտնվում է Սբ. Հովհաննես Մկրտչի հայկական եկեղեցին: Եկեղեցին կառուցվել է 1862 թ.՝ հայ համայնքի ջանքերով: Ըստ եկեղեցական գրառումների՝ Մյանմարում բնակվել են հարյուրավոր հայեր: 1881 թ. նրանց թիվը կազմել է 466, իսկ տասը տարի անց՝ 1295: Սակայն այժմ երկրում բնակվում են երկու-երեք տասնյակից ոչ ավելի հայ, այն էլ՝ խառը ընտանիքներ: Վերջին զտարյուն հայը մահացել է անցյալ տարի: Եկեղեցու հավատացյալներից Ռեյչել Մինուսը հայտնել է, որ չգիտի, թե որքան հայեր են ապրում Յանգոնում, սակայն հուսով է, որ կաթողիկոսի այցը նրանց բոլորի համախմբելու առիթ կդառնա: «Կարծում եմ, որ նրանք կգան խոնարհվելու կաթողիկոսին: Այսպես մենք գոնե կիմանանք, թե որքան ենք այստեղ մնացել», - հավելել է նա: Նրա հայրը՝ 60-ամյա Ռիչարդ Մինուսը թերթին հայտնել է, որ կաթողիկոսին կխնդրի եկեղեցի ուղարկել հայ հոգեւորականի:
