Վրաստանի հետ հարաբերությունները չափազանց կարեւոր են Հայաստանի համար ինչպես Եվրասիական տնտեսական միության անդամակցության (տարանցիկ հաղորդակության հարցերի լուծման մոտեցումներ), այնպես էլ տարածաշրջանային քաղաքականության շրջանակներում: Այդ մասին այսօր՝ հոկտեմբերի 1-ին, մամուլի ասուլիսի ժամանակ հայտարարեց Կովկասի ինստիտուտի փոխտնօրեն, քաղաքագետ Սերգեյ Մինասյանը:
Քաղաքագետը հիշեցրեց, որ մի քանի շաբաթ առաջ Նախիջեւանում տեղի էր ունեցել Վրաստանի, Ադրբեջանի եւ Թուրքիայի պաշտպանության նախարարների հանդիպումը: «Եվ լրատվամիջոցներում լուրեր էին տարածվել, որ ծրագրվում է ստեղծել համատեղ ռազմական կամ կիսառազմական միություն, որի առաքելությունը կլինի նավթային խողովակաշարերի պաշտպանությունը: Չի բացառվում նաեւ, որ մի քանի օր առաջ Վրաստանի պաշտպանության նախարար Իրակլի Ալասանիայի այցը Հայաստան որոշակի առումով պայմանավորված էր հենց դրանով», - նշեց Մինասյանը: Քաղաքագետի կարծիքով, Վրաստանը շատ լավ գիտակցում է, որ Ադրբեջանի նշված մասում անվտանգության ապահովման նպատակով վրացական ուժերի ներկայությունը կարող է լուրջ խնդիրներ առաջացնել, քանի որ ռազմական գործողությունները սկսվելու դեպքում ինչպես Լեռնային Ղարաբաղի պաշտպանության բանակի, այնպես էլ Հայաստանի զինված ուժերի պատասխան հարվածների հավանական թիրախը կլինեն հենց նավթային կառույցները: «Հետեւաբար, վրացական կողմը պետք է լրջորեն մտածի՝ ցանկանո՞ւմ է, արդյոք, նման ծանր իրավիճակում հայտնվել, հաշվի առնելով այն հանգամանքը, որ Հայաստանը Ռուսաստանի ռազմաքաղաքական դաշնակիցն ու ՀԱՊԿ անդամ-երկիր է», - եզրափակեց Մինասյանը:
Հիշեցնենք, որ ընթացիկ տարվա օգոստոսի 18-ին Նախիջեւանում Վրաստանի, Թուրքիայի եւ Ադրբեջանի պաշտպանության գերատեսչությունների ղեկավարների՝ Իրակլի Ալասանիայի, Իսմեթ Իըլմազի եւ Զաքիր Հասանովի միջեւ եռակողմ հանդիպում է տեղի ունեցել: Երեք երկրների պաշտպանության նախարարների կողմից նմանատիպ հանդիպումները անցկացվում են 2012թ.-ից: