Ազգային ժողովի խորհրդարանական ոչ իշխանական չորս ուժերին խոստացել են, որ վաղը կլինի որոշում, ըստ որի, հոկտեմբերի 1-ից ուժի մեջ մտած «Շրջանառության հարկի մասին» օրենքի ուժի մեջ մտնելուց հետո առաջին եռամսյակի ընթացքում հարկային մարմինը ստուգումներ չի իրականացնի փոքր եւ միջին ձեռնարկություններում: Այս մասին այսօր՝ հոկտեմբերի 1-ին, ԱԺ շենք մոտ հավաքված, օրենքի դեմ բողոքող առեւտրականների հետ զրույցում ասաց ԱԺ ԲՀԿ-ական պատգամավոր Միքայել Մելքումյանը։
«Կառավարությունը մեզ հետ համակարծիք չէ: Բայց այս պահի դրությամբ, կարելի է ասել, կա մի փոքր առաջընթաց, չնայած Կառավարության հետ բանակցությունները շատ ծանր են ընթանում: Մեզ խոստացել են, որ դա կլինի կամ վարչապետի որոշմամբ, կամ ֆինանսների նախարարի հրամանով: Բայց մենք պնդում ենք, որ լինի նաեւ Կառավարության որոշում, որպեսզի այսօրվանից մինչեւ դեկտեմբերի 31-ը փոքր եւ միջին ձեռնարկություններում չլինի ստուգում: Չնայած դա օրենքի փոփոխություն չէ, բայց առաջընթաց է»,- նշեց ԲՀԿ-ական պատգամավորը:
Միքայել Մելքումյանը բողոքի դուրս եկած քաղաքացիներին վստահեցրեց, որ «Շրջանառության հարկի մասին» օրենքի վերաբերյալ քննարկումները շարունակվելու են մինչեւ չլինի իրենց բավարարող որոշում:
Հիշեցնենք, որ առեւտրականները բողոքում են 2014թ. հոկտեմբերի 1-ից ուժի մեջ մտած «Շրջանառության հարկի մասին» ՀՀ օրենքի դեմ, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։ Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: Կառավարությունը նոր օրենքը հիմնավորում է խոշոր բիզնեսը հարկային դաշտ բերելու անհրաժեշտությամբ։
