Բարձրաստիճան պաշտոնատար անձանց բնակարաններում, առանձնատներում ավազակային հարձակումներ իրականացնելու մեջ մեղադրվող, «Բանդայի» պարագլուխ համարվող Արտուշ Հակոբյանի փաստաբանը դատարանին կդիմի մատնահետքերի կրկնակի փորձաքննություն անցկացնելու համար: Այս մասին այսօր՝ հոկտեմբերի 1-ին, NEWS.am-ի հետ զրույցում ասաց փաստաբան Հովիկ Արսենյանը։
«Ամբողջ խնդիրը կայանում էր նրանում, որ հստակ գրված չէր` թե ում կողմից էր վերցվել մատնահետքերը դակտոժապավենի վրայից: Այսօր պարզվեց, որ փորձագետն է այդ մատնահետքերը վերցրել, բայց դա ոչինիչ չփոխեց, որովհետեւ այդ փորձագետը կարծես դարձել է «сам себе режисер»,`առանց ընթերակաների ինքը զենքը հետազոտում է, ինքը զննության ենթարկում, 3 հատ մատնահետք հայտնաբերում այդտեղից իր ցանկությամբ, եւ դրանցով էլ նույնականացնում ամբաստանյալների մատնահետքերը»,-ասաց փաստաբանը` նշելով, որ օրենքով գործելու դեպքում ոչ թե փորձագետը, այլ քննիչը դեպքի վայրում պետք է վերցներ այդ մատնահետքերը:
Փաստաբանը կասկածի տակ դրեց այս հանգամանքը եւ ասաց, որ ինքը կպահանջի կրկնակի փորձաքննություն, որովհետեւ հնարավոր է, որ ամբաստանյալների մատնահետքերը այլ առարկանների վրայից, այլ ոչ թե զենքի վրայից են վերցրել:
«Արդեն կասկածի տակ է դրվում, թե այդ մատնահետքերը արդյո՞ք զենքի վրայից են վերցրել, որովհետեւ կան բազմաթիվ վարկածներ, որոնցից մեկն էլ այն էր, որ փորձագետին մատնահետք են տվել եւ այն հարմարեցվել է եզրակացության հետ: Մենք նոր փորձաքննություն կպահանջենք, եւ եթե նոր արդյունքներով մատնահետքերի մկրոմասնիկներում յուղի հետքեր չհայտնաբերվեն ուրեմն այն այլ առարկայից է վերցված, զենքից վրայից չէ»,-ասաց Արսենյանը:
Փաստաբանը նաեւ նշեց, որ Արտուշ Հակոբյանի տան խուզարկություն ապօրինի է եղել` առանց դատարանի համապատասխան թույլտվության:
«Էդ զենքերն ապօրինի են դրվել, խախտում է տեղի ունեցել, հետեւաբար այդ ամբողջ հայտնաբերվածը ապօրինի է , եւ ապացույցների շարքից պիտք է հանել»,-հավելեց Հովիկ Արսենյանը:
Նրա խոսքով` իր պաշտպանյալն անմեղ է, եւ արդար դատաքննության դեպքում պետք է հերքվեն իր պաշտպանյալին առաջադրված մեղադրանքները:
Հիշեցնենք, որ 2011թ. սեպտեմբերի 23-ին ոստիկանության կազմակերպված հանցագործության դեմ պայքարի վարչության աշխատակիցները ձերբակալել էին 16 անձի, որոնցից 11-ին ավելի ուշ ազատ էին արձակել: Կալանավորված Արտուշ Հակոբյանը, Քյարամ Ամոյանը, Արթուր Մանուկյանը, Դավիթ Գալստյանը եւ Սամվել Դավթյանը մեղադրվում են բարձրաստիճան պաշտոնատար անձանց բնակարաններում, առանձնատներում ավազակային հարձակումներ իրականացնելու համար: Ամբաստանյալները պնդում են, որ իրենք մեղավոր չեն, գործը բարդել են իրենց վրա։