«Շրջանառության հարկի մասին» նոր օրենքի դեմ բողոքող առեւտրականները, որոնք այսօր՝ հոկտեմբերի 1-ին, հավաքվել էին Ազգային ժողովի շենքի մոտ՝ պահանջելու լուծում տալ իրենց խնդրին, Ազգային ժողովի նիստից հետո հեռացան՝ որոշելով վաղը՝ հոկտեմբերի 2-ին, հավաքվել Կառավարության շենքի մոտ:
Ազգային ժողովի նիստից հետո բողոքողներին մոտեցան ԲՀԿ եւ ՕԵԿ խմբակցությունների մի քանի ներկայացուցիչներ: ՕԵԿ պատգամավոր Հեղինե Բիշարյանը առեւտրականներին հորդորեց այսուհետեւ իրենց պահանջները ներկայացնել Կառավարության շենքի մոտ՝ նշելով, որ ԱԺ-ում այսօրվա քննարկումից ինքը հասկացել է, որ Կառավարությունը տրամադրված չէ զիջումների գնալու:
«Ես երեկ ասացի, որ պետք է Կառավարության ներկայացուցիչների առջեւ փակել դռները: Այս խնդիրը քաղաքական մեծամասնության ձեռքում է: Քննարկումը դեռ շարունակվելու է առավոտյան, բայց այնքան էլ տրամադրված չենք որեւէ բան փոխելու համար: Դրա համար ես առաջարկում եմ այս միտինգները տեղափոխել Կառավարության առջեւ: Ես չեմ հաավտում, թե վաղը ժամը 10-ին քննարկման ժամանակ մի բան կփոխվի»,-առեւտրականներին ասաց պատգամավորը:
ԲՀԿ պատգամավոր Տիգրան Ուրիխանյանը առեւտրականներին դիմեց՝ խոսելով միայն հոկտեմբերի 10-ի հանրահավաքից: Նա նշեց, որ առեւտրականների պահանջը կդառնա հանրահավաքի պահանջներից մեկը:
«Սա դառնալու է լայն ժողովրդական ալիքի պահանջներից մեկը: Որեւէ այլ լուծում ոչ իշխանական ուժերը չտեսան 12 գումարած 1, 2, պահանջների բավարարման առումով: Դրա համար ոչ իշխանական ուժերը դուրս եկան փողոց, դուրս եկան հրապարակներ եւ սրա համար է հոկտեմբերի 10-ի մեծ համաժողովրդական հանրահավաքը»,-ասաց Տիգրան Ուրիխանյանը:
Հիշեցնենք, որ այսօր ԱԺ-ում խորհրդարանական ուժերը հանդիպել էին Կառավարության անդամների հետ, քննարկել «Շրջանառության հարկի մասին» նոր օրենքը, սակայն քննարկումը կիսատ էր մնացել, այն կշարունակվի վաղը՝ ժամը 10:00-ին:
Հիշեցնենք, որ 2014թ. հոկտեմբերի 1-ից ուժի մեջ է մտնում «Շրջանառության հարկի մասին» ՀՀ օրենքը, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։ Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: Կառավարությունը նոր օրենքը հիմնավորում է խոշոր բիզնեսը հարկային դաշտ բերելու անհրաժեշտությամբ։
