Պարզվեց՝ ՀՀԿ խմբակցությունն իր նախարարներից ավելի զգուշավոր է: Այս մասին հոկտեմբերի 1-ին լրագրողներին հայտարարեց Ազգային ժողովի ՀԱԿ խմբակցության քարտուղար Արամ Մանուկյանը՝ մեկնաբանելով «Շրջանառության հարկի մասին» օրենքում փոփոխությունների դեմ փոքր բիզնեսի ներկայացուցիչների բողոքը:
Նրա խոսքով, կառավարությունն այդ բողոքներում ոչ մի լուրջ բան չի տեսնում: Այդ պատճառով էլ, հավանաբար, օրենքի տեքստում ՀԱԿ-ի առաջարկած որեւէ փոխզիջում չընդունեց: Իշխող կուսակցության պատգամավորներն իրենց փոքր-ինչ այլ կերպ են պահում՝ հնարավոր լուրջ լարվածություն տեսնելով Գյումրիում եւ այլ քաղաքներում:
«Կառավարությունում ոչնչի հետ համաձայն չեն: Նույնիսկ չեն ցանկանում օրենքի գործողությունը հետաձգել մեկ ամսով կամ գոնե 15 օրով»,- հայտարարեց Մանուկյանը: Նրա խոսքով՝ վաղն առավոտյան կառավարությունը ոչ իշխանական պատգամավորներին նոր առաջարկություններ է ներկայացնելու: «Ինձ համար պարզ է մեկ բան. մեր առաջարկներից ոչ մեկը չի ընդունվել»,- հավելեց պատգամավորը:
Հիշեցնենք, որ հոկտեմբերի 1-ին Հայաստանում ուժի մեջ են մտել Շրջանառության հարկի մասին օրենքի փոփոխությունները, որոնք գործելու են փոքր բիզնեսի համար (տարեկան մինչեւ 58.3 մլն դրամի շրջանառություն ունեցող): Առեւտրի սուբյեկտների համար այն 3.5%-ից նվազում է մինչեւ 1%: Միաժամանակ, պահանջվում է բոլոր գործարքների լիարժեք փաստաթղթավորում: Օրենքը փոքր առեւտրականների բողոքի պատճառ է դարձել, ովքեր մի քանի բողոքի ցույց են անցկացրել: Նրանց խոսքով, պահանջել հաշիվ-ապրանքագիր, հատկապես՝ խոշոր բիզնեսից, անիրական է: