Կարմիր գծերի դեմ պայքարող «Դուրս մեր գրպանից» նախաձեռնության անդամներին թույլ չեն տալիս անցկացնել անհնազանդության ավտոերթ դեպի Բաղրամյան փողոցում գտնվող Ազգային ժողովի շենք: Ակցիայի մասնակիցներն այսօր՝ հոտկեմբերի 2-ին, մոտ 20 ավտոմեքենաներով հավաքվել էինՊռոշյան փողոցում՝ Դվին հյուրանոցի հարեւանությամբ, որրպեսզի սկսեին ավտոերթը, սակայն ոստիկանները փողոցը երկու կողմից փակեցին՝ թույլ չտալով շարժվել Պռոշյան փողոցով:
NEWS.am-ի թղթակիցը հաղորդում է, որ մի խումբ ոստիկանների հետ այժմ Պռոշյան փողոցում է նաեւ Երեւան քաղաքի ծառայության բաժնի պետ Կարեն Մովսիսյանը, որը ակցիայի մասնակիցներին ասել է, որ նրանց խմբակային տեղաշարժն անօրինական է՝ մեջբերելով վարչական օրենսգրքի 124-րդ հոդվածի առաջին կետը:
Բողոքի ակցիայի մասնակիցները դեռ կանգնած են Պռոշյան փողոցում, նրանք նշում են, որ չեն ցանկանում գնալ քաղաքի ծայրամասեր, այլ ցանկանում են իրենց ավտոերթն անցկացնել հենց Երեւանի կենտրոնական փողոցներով եւ ուղեւորվել Ազգային ժողովի շենքի մոտ:
Հիշեցնենք, որ «Դուրս մեր գրպանից» նախաձեռնության անդամները պահանջում են վերացնել կարմիր գծերը եւ մինչեւ հուլիսի 26-ը արձանագրված տուգանքների համաներում սահմանել։