«Ռուսալ Արմենալ» փայլաթիթեղի գործարանը արտադրությունում կներդնի 513,4 մլն դրամ (շուրջ 1,25 մլն դոլար): Հոկտեմբերի 2-ին ՀՀ կառավարության նիստում էկոնոմիկայի նախարար Կարեն Ճշմարիտյանը հայտարարել է, որ ընկերության կողմից ներմուծվող սարքավորումների ԱԱՀ-ի վերացումը կերկարացվի 3 տարով:
Ներդրումային ծրագրի շրջանակում գործարանում կստեղծվի 35 նոր աշխատատեղ: Ձեռնարկությունում այժմ միջին աշխատավարձը կազմում է 355 հազար դրամ: Ծրագրի շրջանակում ընկերությունը փայլաթիթեղի այրման վառարան կներմուծի Լեհաստանից եւ փայլաթիթեղի կտրման մեքենա` Բրիտանիայից:
«Ռուսալ Արմենալ» ՓԲԸ-ն ստեղծվել է 2000 թ.` «Քանաքեռի ալյումինի գործարանի» հիմքի վրա: Ընկերությունը փայլաթիթեղի միակ արտադրողն է Կովկասում եւ Կենտրոնական Ասիայում: «Արմենալը» ռուսական «Ռուսալ» ՍՊԸ-ի դուստր ձեռնարկությունն է , այն ապահովում է Հայաստանից ԱՄՆ արտահանման ավելի քան 80%-ը: