Ընթացիկ տարվա 9 ամիսների ընթացքում Հայաստանում թմրանյութերի ապօրինի շրջանառության 883 դեպք է գրանցվել. նախորդ տարվա համեմատությամբ այդ թիվը կրճատվել է: Այդ մասին այսօր՝ հոկտեմբերի 2-ին հայտարարեց ՀՀ ոստիկանության կազմակերպված հանցավորության դեմ պայքարի գլխավոր վարչության պետի տեղակալ, ոստիկանության գնդապետ Վարդան Բադասյանը:
Նրա խոսքով՝ անցած տարվա նույն ժամանակահատվածում նմանատիպ 977 դեպք է գրանցվել: «Նմանատիպ դեպքերի կրճատման պատճառը կայանում է նրանում, որ մենք մեր առջեւ խնդիր ենք դրել աշխատանքները երկու ուղղությամբ իրականցնել. Հանրության հետ աշխատանքներ տանելով՝ մարդկանց ուշադրությունը սեւեռել այդ չարիքի դեմ պայքարի կարեւորությանը, ինչպես նաեւ տարբեր միջոցառումների միջոցով կանխել թմրանյութերի ներմուծումը», - նշեց Բադասյանը: Նա նաեւ հավելեց, որ մեծացել է նաեւ թմրանյութերի մաքսանենգ ներկրմամբ հարուցված քրգործերի թվաքանակը: «362 մարդ վարչական պատասխանատվության է ենթարկվել՝ անցած տարվա 243–ի համեմատությամբ: Հայտնաբերվել է ապօրինի շրջանառության մեջ գտնվող 882 կգ թմրանյութ», - ընդգծեց Բադասյանը:
