Ամերիկյան Tesla Motors ընկերությունը պաշտոնապես ներկայացրել է Model S էլեկտրամոբիլի նորացված տարբերակը, հայտնում է «The Independent»-ը:
Model S-ի ստանդարտ մոդելներից նոր P85D-ի գլխավոր տարբերությունը երկու էլեկտրական շարժիչներն են, որոնցից մեկը ուժ է հաղորդում առջեւի անվադողերին: Այսկերպ էլեկտրական մեքենան լիաքարշակ է դարձել: 0 -ից 100 կմ/ժամն էլեկտրասեդանը զարգացնում է 3 վայրկյանում, եւ սա շուկայում ամենաարագ սեդաններից մեկն է դարձնում այն:
Բացի այդ, P85D-ը ընդունակ է առանց լիցքավորման գրեթե 443 կմ անցնել, ինչը 16 կմ-ով ավելի է նախորդ մոդելի ցուցանիշից:
Մարզական էլեկտրամոբիլի շնորհանդեսի ժամանակ «Tesla Motors»-ի ղեկավար Էլոն Մասկը պատմել է նաեւ ավտոմատ կառավարման գործառույթների մասին, որոնք կհայտնվեն բոլոր մեքենաներում: Համակարգերից առաջինը հնարավորություն է տալիս մեքենային փոխել երթեւեկության գիծը՝ վարորդի կողմից շրջադարձի ազդանշանն այն ժամանակ միացնելուց հետո, երբ տեսախցիկներից ստացված տվյալներն օգտագործելով էլեկտրոնիկան համոզվում է մանեւրի անվտանգության մեջ:
Tesla էլեկտրամոբիլները ինքնուրույն կարող են կայանել, կանգ առնել ճանապարհին խոչընդոտ հայտնաբերելու դեպքում եւ հետեւել ճանապարհային նշաններին: Արագությունը սահմանափակող ցուցանակներ նկատելով՝ մեքենայի էլեկտրոնային համակարգը նվազեցնում է արագությունը՝ մինչեւ թույլատրելի աստիճան:
Model S P85D-ի ամբողջական տարբերակը շուկայում կհայտնվի այս տարվա դեկտեմբերին: Իսկ 2015 թ. փետրվարին կսկսեն նվազ հզոր եւ թանկ մոդելների վաճառքը՝ 60D եւ 85D ինդեքսներով: Ավտոմեքենաները կարժենան 89 հազար դոլարից մինչեւ 120 հազար դոլար:
