Ռուսական ռուբլին շարունակում է թուլանալ համաշխարհային արժույթի նկատմամբ: Վերջերս Ռուսաստանում եվրոն դարձյալ հասավ իր բացարձակ առավելագույն նիշին ընթացիկ տարում՝ 51,2 ռուբլի: Ինչպես հայտնի է, այդ երկրի արժութային շուկայի վրա ազդում է արտաքին քաղաքական ու ներքին տնտեսական խնդիրների գորդյան հանգույցը: Ռուսական տնտեսության ոչ այդքան ուրախալի վիճակին ավելացել են ռուս-ուկրաինական հակամարտության հետեւանքները, ինչպես նաեւ նավթի համաշխարհային գնի անկման միտումները:
Այս ամենից բացի՝ ռուսական ռուբլուն մռայլ հեռանկար է սպասում: Ենթադրվում է, որ գալիք տարում ԱՄՆ-ի դաշնային պահուստային համակարգը կբարձրացնի հաշվետու դրույքը: Եթե տեղի ունենա, ապա դոլարը կամրապնդվի մյուս առաջատար արժույթների համեմատ, այդ թվում նաեւ ռուսական ռուբլու: Սա հավելյալ գործոն կծառայի ռուսական արժույթի թուլացման համար:
Միլիարդավոր դոլարների ուղղակի արտարժութային ինտերվենցիաներից բացի՝ Ռուսաստանի Կենտրոնական բանկը փորձում է պահել ռուբլու արժույթի անկումը սկզբունքային նոր մեթոդներով: Մասնավորապես, հոկտեմբերի վերջին իրականացվելու են խոշոր գործարքներ արտարժույթով: Ընդ որում բանկերի առավելագույն պարտքը նախատեսվում է 2016թ.-ի դեկտեմբերին 50 մլդ դոլարի չափով:
Կօգնի արդյոք հաղթահարել շահարկումներն արժութային շուկահյում, դեռ հայտնի չէ: Որոշ գնահատականների համաձայն, կապիտալի արտահոսքի տարեկան ծավալը Ռուսաստանում կազմել է 100 մլդ դոլար:
Ընթացիկ տարվա հունվարից մինչեւ հոկտեմբերի 17-ը Ռուսաստանում դոլարն ամրապնդվել է 15,6 տոկոսով: Հասկանալի է, որ այդ երկրի աշխատանքային միգրանտների համար սա տհաճ փաստ է: Սակայն անգամ դրամական փոխանցումները ռուբլիով չեն փրկի մեր ստացողներին կորստից: Քանի որ վերոհիշյալ ժամանակաշրջանում Հայաստանում ռուբլին նկատելիորեն «թուլացել է»՝ 17,4 տոկոսով: