Նորքի ինֆեկցիոն հիվանդանոցից փախուստի դիմած Սուրեն Վաչիկի Գաբրիելյանի փաստաբան Հակոբ Ճարոյանը NEWS.am-ի թղթակցին ուղարկել է մի քանի փաստաթղթեր, որոնք ցույց են տալիս, որ Ազգային անվտանգության խորհրդի քարտուղար Արթուր Բաղդասարյանը, իսկապես, գրություն ուղարկել է ԱԱԾ եւ այդ գրության հիման վրա էլ իր պաշտպանյալի դեմ գործ է հարուցվել:
Գրություններից մեկը Արթուր Բաղդասարյանի Իրանի Իսլամական Հանրապետության դեսպանատնից ստացված փաստաթղթերը ԱԱԾ ուղարկելու մասին է, մյուսը այդ գրությունը ԱԱԾ-ում մի քննիչից մյուսին հասցեագրելու մասին է: Մյուս երկու գրությունները վերաբերում են փաստաթղթերի ցուցակին եւ քրեական գործի առաջին էջն է: Հակոբ Ճարոյանը շեշտեց, որ Արթուր Բաղդասարյանի կողմից գրություն ուղարկվել է ապացուցում է նաեւ փաստաթղթերի ուղարկման ամսաթիվը եւ համարը, որը նույնն է:
Հետաքրքիր է, որ եթե Արթուր Բաղդասարյանի ԱԱԾ ուղարկելու գրության մեջ փաստաթղթերի թիվը 25 է, ապա ԱԱԾ-ում մի քննիչից մյուսին վերահասցեագրելիս դրանք դառնում են 10-ը, 15 թերթ կորում է: Այս եւ մի շարք այլ հետաքրքիր հանգամանքների փաստաբանը խոստացել է անդրադառնալ ավելի ուշ:
Ավելի վաղ NEWS.am-ը հայտնել էր, թե Նորքի ինֆեկցիոն հիվանդանոցից փախուստի դիմած Սուրեն Վաչիկի Գաբրիելյանի դեմ քրեական գործ է հարուցվել «Օրինաց երկիր» կուսակցության ղեկավար, այն ժամանակվա Ազգային անվտանգության խորհրդի քարտուղար Արթուր Բաղդասարյանի գրության հիման վրա: Այս մասին NEWS.am-ի թղթակցի հետ զրույցում ասել էր նրա փաստաբանը՝ Հակոբ Ճարոյանը:
Նա նշել էր, որ Արթուր Բաղդասարյանը գրություն էր ներկայացրել՝ նշելով, թե դա ստացել է ՀՀ-ում Իրանի Իսլամական Հանրապետության դեսպանատնից, եւ այդ գրության հիման վրա սկսվել էր հետաքննություն, հարուցվել քրեական գործ, որի շրջանակներում էլ կալանավորվել էր Սուրեն Գաբրիելյանը: Փաստաբանը մտադիր է հենց առաջին դատական նիստին միջնորդություն ներկայացնել եւ Արթուր Բաղդասարյանին դատարան կանչել հարցաքննության: ՕԵԿ մամուլի խոսնակ Արթուր Միսակյանը մեզ հետ զրույցում ասել էր, թե Արթուր Բաղդասարյանը որեւէ նման գրություն չի ուղարկել եւ ընդհանրապես այդ գործի հետ կապ չունի:
Ներկայացնում ենք մեզ ուղարկված փաստաթղթերի լուսանկարները: