Նորվեգացի ուռուցքաբաններն արժանացել են «Idéprisen» մրցանակի՝ քաղցկեղի բուժման մատչելի մեթոդի մշակման համար: Այդ մասին հաղորդում է «ՏԱՍՍ»-ը ՝ վկայակոչելով տեղական լրատվամիջոցներին:
«Idéprisen-2014» ազգային մրցանակը, ինչպես նշում է աղբյուրը, տարեկան հանձնում են նորարարկան ամենանշանակալի մշակումների համար: Այս անգամ պարգեւատրել են իմունոթերապիայի մեթոդի մշակման համար, որ իմաստը օրգանիզմի սեփական բջիջների օգտագործումն է: Ի տարբերություն քիմիո- եւ ռադիոթերապիայի, տվյալ մեթոդը չի վնասում առողջ բջիջներին, իսկ բուժումը հիվանդն ավելի հեշտությամբ է տանում: Գիտնականներն իրենց մշակման համար 100 հազար կրոն են ստացել(15 հազար դոլար):
«Մենք փորձարկել ենք մեթոդը լաբորատորիայում, արդյունքը խոստումնալից է. քաղցկեղի բջիջները ոչնչացել են: Մեր գնահատականների համաձայն՝ հետազոտության ավարտի համար, որպեսզի մեթոդը լայնորեն կիրառվի, հարկավոր է 2-5 տարի ժամկետ»,- հայտարարել է Էլսա Մարիտ Ինդերբերգ Սյուսոն, ով մրցանակի արժանացած գիտնականների թվում է: