ԱՄՆ նախագահ Բարաք Օբաման եւ Թուրքիայի նախագահ Ռեջեփ Թայիփ Էրդողանը հեռախոսով քննարկել են սիրիական խնդիրը, մասնավորապես, Կոբանիում տիրող իրավիճակը եւ քայլերը, որոնք անհրաժեշտ է ձեռնարկել «Իսլամական պետության» գրոհայինների դեմ հաջող պայքարի համար: Այս մասին հաղորդում է USA Today-ը՝ վկայակոչելով Սպիտակ Տան հաղորդագրությունը:
Աղբյուրի փոխանցմամբ՝ հեռախոսազրույցը տեղի է ունցել ԱՄՆ նախագահի նախաձեռնությամբ, որի ժամանակ նախագահները պարտավորվել են ակտիվացնել պայքարը Սիրիայում «Իսլամական պետության» դեմ: Օբաման նաեւ երախտագիտություն է հայտնել Թուրքիային՝ ավելի քան մեկ մլն փախստականների ընդունելու համար, այդ թվում Քոբանիից:
Նշենք, որ իսլամիստների հարձակումները քրդաբնակ Քոբանի քաղաքի վրա շարունակվում են, սակայն ԱՄՆ-ի եւ նրա դաշնակիցների կողմից ավիահարվածները, ինչպես նաեւ քրդերի դիմադրությունը հոկտեմբերի 17-ին ստիպել են իսլամիստներին հետ նահանջել Քոբանիի որոշ շրջաններից:
