Ֆրանսիայի ռազմածովային ուժերի ռադիոէլեկտրոնային հետախուզության նավը 2014թ. ընթացքում արդեն 6-րդ անգամ մտել է Սեւ ծովի ջրային տարածք: Այդ մասին հայտնում է «Ռոսբալտը»՝ վկայակոչելով Ռուսաստանի ռազմածովային ուժերի գլխավոր շտաբին:
Աղբյուրի փոխանցմամբ՝ ֆրանսիական նավը միացել է ամերիկյան նավերին, որոնց 2014թ հոկտեմբերի 10-ից գտնվում են Սեւ ծովի տարածքում:
Գործակալությունը հիշեցնում է, որ մեկ շաբաթ առաջ ֆրանսիական նավը Սեւ ծովից դուրս էր եկել այս տարի իր 5-րդ հետախուզական առաքելությունն իրականացնելուց հետո: Ուկրաինական ճգնաժամի պատճառով Սեւ ծովում գործնականում մշտապես ներկա են ԱՄՆ-ի եւ ՆԱՏՕ-ի մյուս անդամների ռազմածովային ուժերը: 1936թ. ստորագրված Մոնտրեի համաձայնագրի համաձայն, ոչ մերձափնյա պետությունների ռազմանավերը Սեւ ծովում 21-օրից ավելի չեն կարող գտնվել: Այսպիսով, ամերիկյան նավերը տարածաշրջանը կլքեն հոկտեմբերի 30-ից ոչ ուշ, իսկ ֆրանսիական նավերը՝ մինչեւ նոյեմբերի 2-ը: