Ֆրանսիայի արտգործնախարարության ներկայացուցիչը մեկնաբանել է ֆրանսիական քաղաքապետերի այցը Լեռնային Ղարաբաղ:
Ֆրանսիայի ԱԳՆ-ում տեղի ունեցած ճեպազրույցի ընթացքում հարց է բարձրացվել, որ «Ապօրինի այցերը (Բաքվում՝ խմբ.) անհանգստություն են առաջացնում՝ հաշվի առնելով այն հանգամանքը, որ Ֆրանսիան ԵԱՀԿ Մինսկի խմբի համանախագահներից է»:
Ի պատասխան՝ Ֆրանսիայի ԱԳՆ-ի ներկայացուցիչը նշել է, որ նման նախաձեռնությունները չեն փոխում Լեռնային Ղարաբաղի անկախությունը չճանաչած Փարիզի պաշտոնական դիրքորոշումը:
«Որպես ԵԱՀԿ Մինսկի խմբի համանախագահ՝ Ֆրանսիան ներգրավված է հակամարտության դիվանագիտական եւ քաղաքական կարգավորման ուղիների որոնման գործում:
Բանակցություններին նոր ազդակ հաղորդելու նպատակով Ֆրանսիայի Հանրապետության նախագահը ընթացիկ տարվա մայիսին Բաքու եւ Երեւան այցի շրջանակներում իր ադրբեջանցի եւ հայ գործընկերներին առաջարկել էր աշնանը հանդիպել Փարիզում եւ քննարկել իրավիճակից դուրս գալու ուղիները», - հայտարարել է Ֆրանսիայի ԱԳՆ-ի ներկայացուցիչը:
Հիշեցնենք, որ ֆրանսիական պատվիրակության այցը Լեռնային Ղարաբաղ եւ հոկտեմբերի 5-ին Բուր-լե-Վալանս եւ Շուշի քաղաքների միջեւ բարեկամության մասին հռչակագրի ստորագրումը ադրբեջանական կողմից բուռն վրդովմունք է առաջացրել: