Հնագետները բացահայտել են օբյեկտներ, որոնք լույս են սփռում Ուրարտուի սոցիալական եւ մշակութային կյանքի վրա, գրում է «Գիտություն եւ կյանք» ամսագիրը:
Աղբյուրը նշում է, որ պեղումները կատարվում են Վանա բերդի հյուսիսային կողմում գտնվող բլրի վրա: Հնագետները 5 տարվա ընթացքում այնտեղ հայտնաբերել են տարբեր ժամանակաշրջանների գտածոներ. 3 հազար տարեկան կառքերի մոդելներ, հազվագյուտ անոթներ, 5 հազար տարի առաջ օգտագործված շարժական օջախ եւ 2,7 հազար տարեկան զարդեր: Այս տարի ամենակարեւոր գտածոները բրոնզե մամլիչներն են, կավե ցուցանակը եւ քաղաքացիների տները:
Հնագետների հայտնաբերած տներում գտնվել են վառարաններ եւ մթերքների մնացորդներ: Տները մեկ նախագծով չեն կառուցված եղել. Դրանք այնպես են կառուցել, որպեսզի համապատասխանեն մարդկանց պահանջներին: Տների ճարտարապետությունը ցույց է տվել, որ դրանք պատկանել են թագավորական ընտանիքին սպասարկող անձանց:
Աղբյուրը նշում է, որ Ուրարտու պետությունը գոյություն է ունեցել մ. թ. ա. IX–VI դդ.: Իր ծաղկման շրջանում այն ընդգրկել է ողջ Հայկական լեռնաշխարհը: Վանը եղել է պետության մայրաքաղաքը: