Հանրապետական կուսակցության անդամ Ռաֆիկ Պետրոսյանը համոզված է, որ Հայաստանում պետք է վերացվի մեծամասնական ընտրակարգը:
«Մեծամասնական ընտրակարգի հարցը միշտ էլ քննարկվել է: Ինքս կարծում եմ, որ հիմա ամենաճիշտ ժամանակն է, որ անցնենք հարյուր տոկոսանոց համամասնական ընտրակարգի: Կուսակցություններն արդեն կայացել են, մեծամասնական ընտրություններին կատարվում են տարբեր խախտումներ, լցոնումներ: Հետեւաբար, պետք է անցում կատարել»,- այսօր` հոկտեմբերի 20-ին, լրագրողների հետ զրույցում ասաց Ռաֆիկ Պետրոսյանը:
Նրա խոսքով` Սահմանադրական բարեփոխումների նոր հայեցակարգով հնարավորություն կստանան նաեւ դատապարտյալները, որոնց թույլ կտան մասնակցել ընտրություններին:
«Նրանք, ովքեր ծանր հանցագործություն չեն կատարել եւ դատապարտվել են մինչեւ տասը տարվա ազատազրկման, ապա կմասնակցեն ընտրություններին»,- ավելացրեց ՀՀԿ-ական անդամը:
Նշենք, որ հոկտեմբերի 15-ին սահմանադրական բարեփոխումների հարցով փորձագիտական հանձնաժողովը Հայաստանի նախագահին էր ներկայացրել սահմանադրական բարեփոխումների հայեցակարգը:
