Շանթ Հարությունյանի հեղափոխությունը բեմականացում էր, այն` որպես ներկայացում, պետք է ավարտվեր, ոչ թե դառնար քրեական գործ: Այս մասին այսօր` հոկտեմբերի 20-ին, լրագրողների հետ զրույցում ասաց նախկին քաղբանտարկյալ Ազատ Արշակյանը` անդրադառնալով «Նոյեմբերի 5»-ի գործով ավարտված դատավարությանը:
«Պրովոկացիա եղավ նոյեմբերի 5-ին, անպատասխանատու ակցիա տեղի ունեցավ եւ դատարանն անպատասխանատու վճիռ կայացրեց` այսպիսի որոշում կայացնելով: Մեսիջն էլ հետեւյալն էր` մեր իշխանական համակարգում փոխըմբռնում չկա: Հասարակությունը տուժեց, որովհետեւ քաղաքական իշխանությունները ճիշտ չվարվեցին: Անչափահաս երեխային ներգրավվել են, ներքաշել են մի ակցիայի մեջ: Եթե քրեական ակցիա էր, ապա հասարակական կազմակերպությունները, հարազատները պետք է երեխային հեռացնեին այդ հրապարակից: Ովքե՞ր են անգործություն դրսեւորել, որ երեխան հայտնվել է քրեական միջավայրում: Եթե անգործություն չի դրսեւորվել, ապա քրեական տարրեր այդ ակցիան չի պարունակել»,- ասաց Ազատ Արշակյանը:
Նախկին քաղբանտարկյալի կարծիքով` այսօր Հայաստանում պետք է խոսվեր Կարսի պայմանագրի դրույթների վերանայման մասին, ոչ թե «Նոյեմբերի 5»-ի գործին:
Հայաստանի Հելսինկյան կոմիտեի նախագահ Ավետիք Իշխանյանն էլ է համոզված, որ նոյեմբերի հինգին Շանթ Հարությունյանն ընդամենը բեմադրություն էր կազմակերպել:
«Խաղաղ երթ էր, եթե ոստիկանությունը չխոչընդոտեր, ընդհարումները չէին լինի: Ընդունենք, որ եղել է զանցանք, հանցանքի տարրեր, դրա համար էդպիսի՞ խիստ պատիժ: Աշխարհում նման բան չկա, մարդկանց տանում են, հետո բաց են թողնում: Սա դաժան հաշվեհարդար է»,- ավելացրեց Ավետիք Իշխանյանը:
Հրապարակախոս Կարինե Հակոբյանն էլ կարծում է, որ հոկտեմբերի 17-ի վճիռն ապացուցում է, որ մեր արդարադատությունը երկու ոտքով կաղում է:
«Իշխանությունը կտրվել է հասարակությունից, այնպիսի խնդիրներ ունենք, որ պետք է համախմբվենք, ոչ թե պառակտվենք»,- նշեց Կարինե Հակոբյանը:
Հիշեցնենք, որ «Նոյեմբերի 5»-ի գործով ամբաստանյալ, «Ցեղակրոն» կուսակցության նախագահ Շանթ Հարությունյանին հոկտեմբերի 17-ին Երեւանի Կենտրոն եւ Նորք Մարաշ համայնքների ընդհանուր իրավասության դատարանի դատավոր Մնացական Մարտիրոսյանը մեղավոր էր ճանաչել ՀՀ Քրեական օրենսգրքի 258-րդ հոդվածի 4-րդ մասով ու դատապարտել 6 տարվա ազատազրկման:
Դատարանը Շանթ Հարությունյանի անչափահաս որդուն՝ 15-ամյա Շահեն Հարությունյանին նույն հոդվածով դատապարտել էր 4 տարվա ազատազրկման՝ պատժի պայմանական չկիրառմամբ։
