Հայաստանի Հելսինկյանի կոմիտեի նախագահ Ավետիք Իշխանյանը համոզված է, որ եթե Շանթ Հարությունյանին եւ ընկերներին աջակցեին հասարակական կազմակերպությունները, քաղաքական ուժերը, միջազգային կառույցները, ապա վճիռն այսպիսին չէր լինի: Այսօր` հոկտեմբերի 20-ին, լրագրողների հետ զրույցում Ավետիք Իշխանյանը նշեց, որ Շանթն ու ընկերները միայնակ էին մնացել:
«Իշխանությունները Շանթին եւ ընկերներին չներեցին, որ դատական նիստերին մինչեւ վերջ չէին զղջում եւ ափսոսանքի խոսքեր չէին ասում: Այս վճռին էլ նպաստեց այն, որ նրանց ոչ ոք չանդրադարձավ. Ոչ միջազգային կառույցները, ոչ քաղաքական ուժերը: Պահանջում եմ, որ կուսակցությունները հանդես գան համապատասխան հայտարարությամբ: Գիտեմ, որ ՀԱԿ-ն արդեն դա արել է, սակայն դա բավական չէ»,- ասաց Ավետիք Իշխանյանը:
Նրա խոսքով` ամբողջ հասարակությունը պետք է կանգնի Շանթ Հարությունյանի եւ ընկերների կողքին. «Շանթն ու ընկերները քաղբանտարկյալներ են: Նրանք քաղաքական գործողություն են կատարել, սակայն իրենց պատիժը համաչափ չէր կատարվածի հետ: Խտրական վերաբերմունք կար նրանց նկատմամբ: Համեմատենք Գորիսի դեպքերի հետ, այդ ժամանակ էլ էր չէ՞ խուլիգանություն: Գորիսում գիտենք ինչ եղավ, իսկ Երեւանում` ինչ: Խտրական վերաբերմունքը հստակ է»:
Հիշեցնենք, որ «Նոյեմբերի 5»-ի գործով ամբաստանյալ, «Ցեղակրոն» կուսակցության նախագահ Շանթ Հարությունյանին հոկտեմբերի 17-ին Երեւանի Կենտրոն եւ Նորք Մարաշ համայնքների ընդհանուր իրավասության դատարանի դատավոր Մնացական Մարտիրոսյանը մեղավոր էր ճանաչել ՀՀ Քրեական օրենգսրքի 258-րդ հոդվածի 4-րդ մասով ու դատապարտել 6 տարվա ազատազրկման:
Դատարանը Շանթ Հարությունյանի անչափահաս որդուն՝ 15-ամյա Շահեն Հարությունյանին նույն հոդվածով դատապարտել էր 4 տարվա ազատազրկման՝ պատժի պայմանական չկիրառմամբ։
