Եթե որեւէ մեկը բացատրի՝ ինչ է ուզում եռյակը սահմանադրական բարեփոխումների հետ կապված, ապա ես կարող եմ մեկնաբանել նրանց գործողությունները: Այս մասին հոկտեմբերի 20-ին լրագրողներին հայտնել է ՀՅԴ խմբակցության ղեկավար Արմեն Ռուստամյանը՝ մեկնաբանելով եռյակի՝ այս կամ այն կերպ սահմանադրական բարեփոխումների հայեցակարգի քննարկմանը մասնակցելու ցանկության բացակայությունը:
Ըստ Ռուստամյանի` խորհրդարանական եռյակը տեղյակ է, թե ինչպիսի «կարմիր գծեր» գոյություն ունեն ՀՅԴ-ի համար նախագահական կառավարման համակարգից խորհրդարանականի անցնելու պլանում: «Մենք բացահայտ հայտարարել ենք այդ մասին: Խորհրդարանական եռյակի պաշտոնական տեսակետը հետեւյալն է. նրանք սահմանադրական բարեփոխումների հետ կապված ոչ մի քննարկում չեն ընդունում: Սակայն եթե Հայաստանի նախագահը հայտարարի, որ սահմանադրական բարեփոխումները չեն լինելու, դա ամենամեծ բացթողումը կդառնա ինչպես մեր երկրի, այնպես էլ ընդդիմության համար: Եթե եռյակի նպատակն այն է, որպեսզի երկրում չիրականացվեն կառուցողական փոփոխություններ, ապա ես ողբում եմ մեր վիճակը: Եթե գոյություն ունեցող կառուցվածքը մնա, ապա մենք կունենանք չորրորդ նախագահ, որից դժգոհ կլինեն բոլորը»:
Ի պատասխան հարցին, թե ՀՅԴ-ն չի վախենում արդյոք իշխանության կողմից օգտագործված լինելուց, Ռուստամյանը պատասխանել է. «Դա կախված է նրանից, թե ում են օգտագործում: Եթե մարդը չգիտի` ինչ է անում, իհարկե, նրան օգտագործում են, իսկ եթե մենք գիտենք` ինչ ենք անում արդեն 25 տարի, պահանջելով կառավարման համակարգի փոփոխություն, իսկ այսօր այն իրականանում է, ստացվում է` մեզ օգտագործո՞ւմ են: Ինչո՞ւ մյուս նախագահները չեն ասում, որ իրենց առջեւ էլ է դրված եղել կառավարման համակարգի փոփոխության խնդիրը: Ինչո՞ւ նրանք այդքան համարձակություն չունեն այդ մասին հայտարարելու: Հայտարարում են, որ ՀՅԴ-ն մնացել է միայնակ, սակայն դա այդպես չէ: Միայնակ է մնացել ՀՀՇ-ն` ներկայիս ՀԱԿ-ը, քանի որ դա միայն քաղաքական ուժն է, որը դեմ է կառավարման խորհրդարանական համակարգին: Մյուսները կողմ են:
