Եվրամիություն ձգտող Թուրքիան չի ապրում ժողովրդավարական արժեքներով: Այս մասին, այսօր՝ հոկտեմբերի 20-ին, ԱԺ-ում լրագրողների հետ զրույցում նշել է Հայաստանի խորհրդարանի փոխնախագահ Էդուարդ Շարմազանովը՝ մեկնաբանելով հոկտեմբերի 12-17-ին Ժնեւում կայացած Միջխորհրդարանական միության (IPU) նիստին ՀՀ պատվիրակության մասնակցությունը:
Նա նշել է, որ եվրոպացի գործընկերների հետ երկկողմ հանդիպումներում հայկական պատվիրակությունը քննարկել է հայ-թուրքական հարաբերությունների եւ Ցեղասպանության ճանաչման հարցերը:
Եվրոպացի գործընկերները հետաքրքրվել են 2010-ին Ցյուրիխում կնքված հայ-թուրքական արձանագրությունների ճակատագրով:
«Հայաստանի Հանրապետությունը երբեք որեւէ նախապայման չի դրել հարաբերությունների հաստատման համար: Թուրքիան այսօր ունի Եվրոպայում վերջին փակ սահմանը: պետությունը, որն ուզում է ԵՄ անդամ դառնալ, չի ապրում ժողովրդավարական արժեքներով»,-հայտարարել է ԱԺ փոխնախագահը:
Նրա խոսքով՝ հայկական պատվիրակությունը երախտագիտություն է հայտնել բոլոր երկրների խորհրդարաններին, որոնք ճանաչել ու դատապարտել են Հայոց ցեղասպանությունը: «Մենք երախտագիտություն ենք հայտնել Հունաստանի խորհրդարանին, որը պատասխանատվություն է սահմանել այդ հանցագործությունը ժխտելու համար: Նաեւ մեր հույն գործընկերներին հրավիրել ենք մասնակցել 2015-ի ապրիլին կայանալիք Ցեղասպանության 100-րդ տարելիցի միջոցառումներին: Նրանց մեծ մասն արդեն բանավոր համաձայնություն են տվել, իսկ մարտին վերջնական, գրավոր համաձայնություն կտան»,-ընդգծել է Շարմազանովը: