ՀՅԴ խմբակցությունը չի միացել ոչ իշխանական ուժերի եռյակի նախաձեռնությանը՝ ԱԺ արտահերթ նիստ հրավիրել իշխանության ճգնաժամային իրավիճակի հարցով: Այս մասին, այսօր՝ հոկտեմբերի 20-ին, ԱԺ-ում լրագրողների հետ զրույցում նշել է ՀՅԴ խմբակցության ղեկավար Արմեն Ռուստամյանը՝ հավելելով, որ եռյակի աշխատանքի այսօրվա ոճն անընդունելի է: «ՀՅԴ-ն երբեք թույլ չի տա խոսել նման ոճով: Մենք միանում ենք բոլոր նախաձեռնություններին, որոնց մասնակցել ենք: Սակայն եթե մեզ հետ չեն քննարկվել այս կամ այն հարցերը, իսկ հետո թուղթ են դեմ տալիս ստորագրելու համար, մենք նման բան երբեք չենք արել ու չենք անելու»,-պարզաբանել է Ռուստամյանը:
Ճշտող հարցին, թե փաստացի ՀՅԴ-ն դուրս է եկել խորհրդարանական քառյակից, Ռուստամյանը պատասխանել է. «Մենք այնտեղ ենք, որտեղ եղել ենք 124 տարի: Հետաքրքիր է, ինչու նրանք մեզ հետ չեն քննարկելի այդ նախաձեռնությունը»:
Դիտարկմանը, որ գուցե եռյակում համարում են, որ ՀՅԴ-ն ու իշխանությունները գործարքի են գնացել, դրա համար չեն քննարկելի իրենց հետ այդ նախաձեռնությունը« ՀՅԴ խմբակցության ղեկավարն ասել է. «Լսեք, նրանք նույնպես բանակցություններ են վարում իշխանությունների հետ: Նրանք բանակցում են բոլոր հարցերով, հետո կերեւա»: