Ամառային եւ ձմեռային սեզոններին ռուսական գազի տարբեր գների շուրջ Ուկրաինայի հետ ոչ մի պայմանավորվածություն ձեռք չի բերվել, հայտնում է «ՏԱՍՍ»-ը՝ մեջբերելով Ռուսաստանի արտգործնախարար Սերգեյ Լավրովին:

«Չգիտեմ՝ որտեղից են հայտնվել այս թվերը: Խոսքն ընդհանրապես ամառային կամ ձմեռային ժամանակահատվածների մասին չի եղել: Խոսքը մոտակա 5 ամիսների մասին է: 5 ամսվա սահմաններից դուրս ոչինչ չի կանխորոշվել», - հայտարարել է ՌԴ-ի արտգործնախարարը:

«Միակ չհամաձայնեցված խնդիրը 1.5-2 ամիս ժամանակահատվածն է, որ Ուկրաինան պետք է հաղթահարի: Ուկրաինային մոտ 1,5 մլրդ եվրո է պակասում: Կարծում եմ, որ Եվրահանձնաժողովը, Գերմանիան կամ Ֆրանսիան լիովին կարող էին 1.5 ամսվա համար Ուկրաինային այդ միջոցները փոխառության տալ այդ: Եթե նրանք դա անեին, ապա գազի շուրջ համաձայնությունը դեռ Միլանում ձեռք կբերվեր», - նկատել է Լավրովը:

Հիշեցնենք, որ Ուկրաինայի վարչապետ Արսենի Յացենյուկը հայտարարել էր, որ Ուկրաինան իր հաշիվներում 3,1 մլրդ դոլար ունի, որը երկիրը կարող է օգտագործել գազի դիմաց վճարելու համար: Յացենյուկը նաեւ հավելել է, որ ինքը պաշտպանում է գազի ժամանակավոր գնի սահմանման պայմանները՝ կախված սեզոնից (325 դոլար ամռանը եւ 385 դոլար՝ ձմռանը մեկ խմ-ի համար):