Հայաստանում դեռեւս իշխանափոխության գործընթացը չի սկսվել, քանի որ խորհրդարանական եռյակի մեջ մտնող ուժերը երկրի արտաքին ու ներքին քաղաքականության վերաբերյալ ընդհանրապես տարբեր դիրքորոշումներ են արտահայտում: Այդ մասին այսօր՝ հոկտեմբերի 20-ին, լրագրողներին հայտարարեց Ազգային ժողովի նախագահ Գալուստ Սահակյանը՝ մեկնաբանելով խորհրդարանական եռյակի գործողությունները: («Ժառանգություն», ԲՀԿ, ՀԱԿ):
«Յուրաքանչյուր քաղաքացի կարող է հայտարարություններ անել: Արդեն 10 տարի նրանք հայտարարություններ են անում եւ ի՞նչ», - նկատեց Սահակյանը՝ մեկնաբանելով Հայ ազգային կոնգրեսի առաջնորդ Լեւոն Տեր-Պետրոսյանի հայտարարությունը, որ նրանք չեն նահանջի, եթե իշխանությունները խելամիետ առաջարկներ չունենան:
Խորհրդարանի ղեկավարը նշեց, որ ողջունում է հոկտեմբերի 10-ին Ազատության հրապարակում տեղի ունեցած հանրահավաքի բազմամարդությունը. «Ես ողջունում եմ, ոչ թե նրա համար, որ սա ամենաբազմամարդ հանրահավաքն էր, քանի որ ՀԱԿ-ի նախորդ ցույցերին ներկա էր ընդամենը 5-6 հազար մարդ, բայց հայտարարում էին 50 հազարի մասին: Ուստի, եթե այժմ խոսում են 15-20 հազար մարդու մասին, նշանակում է, որ այն ամենաբազմամարդ ցույցը չէ»:
Միաժամանակ, Սահակյանը ընդունեց, որ երկրում կան խնդիրներ, եթե բազմամարդ հանրահավաքներ են տեղի ունենում: «Բնականաբար, մենք պարտավոր ենք հաշվի նստել ժողովրդի կարծիքի հետ, ինչն էլ մենք անում ենք ամեն օր: Մենք ինքներս ենք հայտարարում, որ կա արտագաղթ, կա կոռուպցիա, մենք ինքներս քննադատում ենք մեզ: Ընդդիմությունը նույնպես մեզ քննադատում է ավելի խիստ ձեւով եւ դա մատուցում ժողովրդին: Մեր համար առաջին խնդիրը ժողովրդի վիճակի բարելավումն է, սակայն երազանքներն ու ցանկությունները մի բան են, իսկ կոնկրետ հնարավորությունները՝ այլ»: