Ազատագրված Քարվաճառի շրջանում հուլիսին ադրբեջանցի դիվերսանտների կողմից դաժանաբար սպանված 16-ամյա Սմբատ Ցականյանի հարազատները միայն մի բան են ցանկանում. կալանավորված ադրբեջանցիներին ԼՂՀ իշխանությունները հանձնեն իրենց, որպեսզի դիվերսանտների հետ վարվեն այնպես, ինչպես վերջինները՝ 16-ամյա տղայի հետ:
«Հոկտեմբերի 27-ին Ստեփանակերտում դատն է լինելու, մենք գնալու ենք, բայց ուզում ենք, որ էդ ադրբեջանցիներին տան մեզ, մենք մեր վճիռը կտանք, ոչ թե բերդում նստացնեն: Դրան մենք համաձայն չենք, մենք մեր ձեռքով պիտի սպանենք էդ արդբեջանցիներին, տանենք մեր գերեզմանոցների վրա սպանենք, ոնց որ իմ բալին սպանեցին, մենակ էդպես մեր սիրտը կհանգստանա, որպես ի՞նչ են նստացնում»,- NEWS.am-ի թղթակցի հետ զրույցում ասաց Սմբատ Ցականյանի մայրը՝ տիկին Կարինեն:
Տիկին Կարինեն պատմեց, որ Սմբատին սպանել են անտառում, այն էլ նրանից գումար եւ սնունդ վերցնելուց հետո. «Դաժան բան են արել իմ բալայի հետ, դրանց թողնեմ, որ սա՞ղ լինեն: Չէ, պիտի սպանեն, որ իմ ու հարազատներիս, բարեկամներիս սիրտը հանգստանա»:
Նշենք, որ հուլիսի 10-ին լուրեր էին տարածվել, որ ադրբեջանցի դիվերսանտները Քարվաճառի 16-ամյա մի բնակչի են գերեվարել, որին մի քանի օր շարունակ հարազատները գտնել չէին կարողանում: Հուլիսի 15-ին տղայի դին հայտնաբերել են, իսկ մեկ օր անց էլ հուղարկավորել նրան փակ դագաղով, հարազատներին թույլ չեն տվել նույնիսկ դիակը տեսնել: Հիշեցնենք, որ այս գործով 2 մեղադրյալ կա: Դիլհամ Ասկերովին եւ Շահբազ Գուլիեւին մեղադրանք են առաջադրվել ԼՂՀ Քրեական օրենսգրքի 129-րդ հոդվածի 3-րդ մասի 1-ին կետով` մարդուն բացահայտ առևանգելը, կյանքի համար վտանգավոր բռնություն գործադրելով, զենքի գործադրմամբ, անչափահասի նկատմամբ կատարված` կազմակերպված խմբի կողմից, Քրեական օրենսգրքի 103-րդ հոդվածի 2-րդ մասի 3-րդ, 7-րդ և 14-րդ կետերով` սպանությունը`զուգորդված մարդուն առևանգելով, կազմակերպված խմբի կողմից, ազգային ատելությանշարժառիթով և ԼՂՀ քրեական օրենսգրքի 33-րդ հոդվածով, 103-րդ հոդվածի 2-րդ մասի 1-ին, 7-րդ և14-րդ կետերով` կազմակերպված խմբի կողմից ազգային ատելության շարժառիթով երկու անձանց սպանության փորձ: Գործով առաջին նիստը նշանակված է հոկտեմբերի 27-ին Ստեփանակերտում: