Արարատի եւ Վայոց Ձորի մարզերի ընդհանուր իրավասության դաստարանում այսօր՝ հոկտեմբերի 20-ին, ԱԺ ԲՀԿ-ական պատգամավոր Կարո Կարապետյանին (Յուվեցի Կարո) միջին ծանրության մարմնական վնասվածք պատճառելու գործով դատական նիստին մեղադրյալ Արթուր Զադոյանի փաստաբանը բացարկի միջնորդություն ներկայացրեց գործը քննող դատավոր Թաթուլ Պողոսյանին։
«Նախորդ դատական նիստին խախտվել են քրեական դատավարության այնպիսի նորմեր, որոնք, մասնավորապես, սահմանում են դատաքննության կարգը։ Դատական օրենսգրքի 90-րդ հոդվածի 1-ին մասի 1-ին կետով դատավորը կանխակալ վերաբերմունք ունի կողմերից մեկի նկատմամբ, եւ իր պարտականությունները կողմերի նկատմամբ անկողմնակալ չի իրականացնում։ Ելնելով նրանից, որ նախորդ դատական նիստին տուժող կողմը անհարգալից վերաբերմունք է դրսեւորել դատարանի եւ, մասնավորապես, ամբաստանյալի նկատմամբ, որը դրսեւորվել է նրա նկատմամբ սեռական բնույթի հայհոյանքներ հնչեցնելով, վկայի հարցաքննությանը միջամտելով, վկային ուղղորդելով եւ նրա փոխարեն հարցերին պատասխանելով, ինչպես նաեւ վիրավորելով անգամ վկային։ Այս հանգամանքները դատարանի կողմից պատշաճ արձագանք չեն ստացել, որի արդյունքում խախտվել է քրեադատավարական կարգը, այս ամենից ելնելով գտնում ենք, որ դատարանը չի կարող շարունակել գործի քննությունը եւ բացարկի միջնորդություն ենք ներկայացնում նախագահող դատավորին»,- միջնորդությունը ներկայացրեց Արթուր Զադոյանի փաստաբանը՝ Սուսաննա Սարգսյանը։
Նրա խոսքով՝ դատավորը պարտավոր էր միջոցներ ձեռնարկել, դատարանում կարգ ու կանոն պահպանելու եւ փոխադարձ վիրավորանքները կանխելու ուղղությամբ, ինչը չի արել։
Մեղադրողն ու տուժող Կարո Կարապետյանի փաստաբան Կրոմվել Գրիգորյանը առարկեցին միջնորդությանը՝ պնդելով, որ այն պետք է մերժվի։
Դատավորը խորհրդակցական սենյակից վերադառնալուց հետո հայտարարեց, որ միջնորդությունը մերժում է։
Նշենք, որ այսօր գործով տուժող ԲՀԿ-ական պատգամավոր Կարո Կարապետյանը դատարան չի ներկայացել, սակայն դատարանում ներկա են նրա 10-ից ավելի անվտանգության աշխատակիցները։
Հիշեցնենք, որ 2009թ. հոկտեմբերին, Երասխ-Երևան ավտոճանապարհին, Մարմարաշեն գյուղի հատվածում, ԱԺ ԲՀԿ պատգամավոր Կարո Կարապետյանն իր ավտոմեքենայում վեճի էր բռնվել Դվին գյուղի բնակիչ, Արարատի մարզպետարանի աուդիտոր Արթուր Զադոյանի հետ, որի ընթացքում Արթուր Զադոյանը ավտոմեքենայի համարանիշ ամրացնելու բանալիով հարվածել էր Կարո Կարապետյանի գլխին, որն էլ իրեն ամրակցված «Բրաունինգ» տեսակի ատրճանակով 5 անգամ կրակել էր Արթուր Զադոյանի ուղղությամբ: Փամփուշտներից երկուսը դիպել էին Զադոյանի աջ ուսին և աջ ոտքին: Կարո Կարապետյանը նաև ծեծի էր ենթարկել Արթուր Զադոյանին, ով ոտքերի հարված էր ստացել գլխին և ուղեղի ցնցում ստացել: Զադոյանը տեղափոխվել էր «Էրեբունի» բժշկական կենտրոնի վերակենդանացման բաժին և 3 վիրահատության ենթարկվել: ՀՔԾ-ում գործը վերաբացվել է այս տարվա մարտին: Արթուր Զադոյանին մեղադրանք է առաջադրվել այն բանի համար, որ նա ապօրինի կերպով ձեռք է բերել, պահել կրել հրազեն և ռազմամթերք եւ Կարո Կարապետյանի առողջությանը դիտավորությամբ պատճառել է միջին ծանրության վնաս և տվել սպանության սպառնալիքներ: Նշենք, որ ԲՀԿ-ական պատգամավորի եւ Զադոյանի միջեւ թշնամանքի պատճառը խոշոր գումարն է՝ 57,600 դոլար, որը պատգամավորի պդնմամբ՝ Զադոյանը պարտք է իրեն։ Զադոյանի պնդմամբ՝ պատգամավորն է պարտք իրեն։