2008թ-ի մարտի 1-ի դեպքերը կբացահայտվեն միայն իշխանափոխության դեպքում: Այս մասին հոկտեմբերի 20-ին Ազգային ժողովում հայտարարեց ընդդիմադիր պատգամավոր Նիկոլ Փաշինյանը: «Սպանություններն առայսօր բացահայտված չլինելու գործում մեծ դեր են խաղացել նախկին Գլխավոր դատախազ Աղվան Հովսեփյանը եւ Սերժ Սարգսյանը», - ընդգծել է Փաշինյանը:
«Ովքեր ծանոթ են Աղվան Հովսեփյանի գործունեությանը, նրա հայտարարությունների վրա չպետք է զարմանան 1998թ. օգոստոսին իր աշխատասենյակում սպանվել էր ՀՀ գլխավոր դատախազ Հենրիխ Խաչատրյանը: Աղվան Հովսեփյանը, ով այդ ժամանակ գլխավորում էր դատախազության քննչական վարչությունը, գտնվել էր շենքում: Նա բոլոր բացահայտումները «իրականացրեց» եւ դարձավ ՀՀ գլխավոր դատախազ: Իսկ այդ բացահայտումներն ասում էին, որ Հենրիխ Խաչատրյանին սպանել է ՀՀ տրանսպորտի դատախազ Արամ Կարապետյանը եւ վերջում էլ ինքնասպանություն գործել», - նշել է Փաշինյանը:
«Հանրապետության ՆԳ զորքերի հրամանատար Արծրուն Մարգարյանի ինքնասպանությունն Աղվան Հովսեփյանը «բացահայտեց» նույնկերպ. Մարգարյանը մեկ անգամ գլխին է կրակել, երկրորդ անգամ՝ սրտին: Սպանվածների ցուցակում են նաեւ պաշտպանության փոխնախարար Վահե Խոռխոռունին եւ 1999թ. հոկտեմբերի 27-ի ու 2008թ. մարտի 1-ի զոհերը: Մենք իշխանափոխության անհրաժեշտության ենք հանգել, բայց ոչ կուլիսների հետեւում իշխանության տրանսֆորմացիայի: Միայն այդպես այդ սպանությունները կբացահայտվեն», - ասել է ընդդիմադիրը: